ئەندام و میلیشیایێن حەشدا شەعبی مژوولی بەرھەڤکرنا ئالا و پۆستەرانە بۆ وێ یەکێ ل رۆژا سیێ مەھا کانوونا دویێ ب خرڤەبوونەکا مەزن سالڤەگەرا کوشتنا قاسم سولەیمانی و ئەبو مەھدی موھەندس بگێرن.
محەمەد نەجم، رێڤەبەرێ ئۆفیسا میدیای یا حەشدا شەعبی راگەھاند، ئەو وەسا ھزر دکەن رەوشا ئێمناھیێ ل رۆژا خرڤەبوونێ تێکناچیت و چ ترس ل سەر رەوشا ئەمنی نابن، دێ بزاڤان ژی کەن د وێ رۆژێ دا پێگیریێ ب قانوون و رێنمایێن ئێمناھیێ بن، ژبەرکو ئەو پشکەکن ژ پێکھاتەیا ئەمنی یا ئیراقێ.
چاڤەرێ دھێتە کرن د رۆژا خرڤەبوونا ئەندامێن حەشدا شەعبی دا دروشم دژی ئەمریکا بھێنە بلندکرن، ل گۆرەی گۆتنا رێڤەبەرێ ئۆفیسا میدیای یا حەشدا شەعبی، ئەو خرڤەبوون بۆ دەربڕینا دەنگێ گەلێ ئیراقێ یە.
