پەرلەمانتارەکا فراكسیۆنا پارتى ل په‌رله‌مانێ كوردستانێ راگه‌هاند، گرێبەستێن حکومەتا ھەرێمێ دگەل کۆمپانیێن بەرھەمئینانا پەترۆلێ، باشترین گرێبەستن ل سەرانسەرێ جیھانێ.
نەجات شەعبان ئامێدی، ئەنداما پەرلەمانێ کوردستانێ و جێگرا فراکسیۆنا پارتی بۆ خانی نیوز راگەھاند؛ جوداهییا ھەردو حکومەتێن ئیراق و کوردستانێ د بیاڤێ پەترۆلێ دا ئەوە، ل ئیراقێ كێلگه‌هێن پەترۆلێ ھەنە و دئامادەنە و بتنێ کۆمپانی بۆ زێدەکرنا بەرھەمێ پەترۆلێ کاربکەن، لێ ل ھەرێما کوردستانێ کەرتێ پەترۆلێ ژ سفرێ دەست پێ کریە.
نەجات شەعبان، دیار کر، د سەر نەمەزاختنا پارەی و نەبوونا تەکنەلۆژیا و شارەزاییێ د وارێ پەترۆلێ دا، ھەرێمێ باشترین گرێبەست دگەل کۆمپانیێن جیھانی گرێداینە ئەو ژی گرێبەستێن بناڤێ” گرێبەستێن پشكداربوونێ د بەرھەم ئینانێ دا.
ئامێدی گۆت ژی: پەرلەمانێ کوردستانێ ل سالا ٢٠٠٧ قانوونا پەترۆل و غازێ دەرئێخست دا پشتەڤانیێ ل گەشەپێدانا ھێدروکاربۆنێن ھەرێمێ بکەت، ئەڤە ژی د چارچوڤێ قانوونێ دا پشتەڤانییێ ل ژینگەھ وەبەرھێنانا دادپەروەرانە دکەت، پەیمانێن پشكداربوونێ د چێکرنێ دا ساز دکەت ب رەنگەکی کو مەترسی و قازانجێن وەبەرھێنانێ ل ھەرێما کوردستانێ ھەڤسەنگ بکەت.
ئەنداما پەرلەمانێ كوردستانێ دیار ژی کر، سادەبوون، زەلالبوون و دادپەروەریا وان گرێبەستان ل سەرانسەرێ جڤاتا وزەیا جیھانی ھاتینە نیاسین و پەسەندکرن و بسپورێن پەترۆل و دارایی یێن جیھانی ئەڤ چەندە دوپات کرییه کو گرێبەستێن پشكداربوونێ د بەرھەم ئینانێ دا ل حکوومەتا ھەرێما کوردستانێ بەربەلاڤترین رێکە بۆ لێگەریان و پێشخستنا پەترۆلێ و کۆمپانیێن پەترۆلێ ھانددەن ب باشترین شێوە و رێکەکە ژ بۆ ڤەگوھاستنا زانین و شارەزاییان.
