دەستھەلاتدارێن ئەمریکا و ئیراقێ ھۆشداری ژ ھەر ھێرشەکێ ل سەر دبلۆماتکار و ھێزێن سەربازی یێن ئەمریکا دانە ھەر ئێک ژ ئیرانێ و میلیشیایێن سەر ب وان ڤە ل ئیراقێ.
ل گۆرەی نووچەیەکێ رۆژناما وول ستریت جورنال یا ئەمریکی، بەرپرسێن ئەمریکی دوپات دکەن، د گەل نێزیکبوونا سالرۆژا کوشتنا قاسم سولەیمانی و ئەبو مەھدی موھەندس کو دکەڤیتە سوبە رۆژا ئێکشەمبی، ھەر کارەکێ ژ ئالیێ ئیرانێ ڤە بھێتە کرن دێ بەرسڤەکا بلەز و ب ھێز ھەبیت.
بەرپرسێن ئەمریکی ئاشکرا دکەن، ئیران پلانان بۆ ھێرشکرنێ ل سەر ھێزێن ئەمریکی ل دەڤەرێ دادرێژیت و ئاماژە ل دۆر ھێرشەکا ئیرانی یا پێشبینی کری ل رۆژھەلاتا ناڤین ھەنە، لێ نزانن بەرھەڤیێن ئیرانێ بۆ بەرگرییێ نە یان بۆ ھێرشکرنێ نە.
بەرپرسێن ئیرانێ ژی بەردەوام گەفێن تۆلڤەکرنێ ل ئیرانێ دکەن، ژ وانا حسێن سەلامی، فەرماندارێ سوپایێ پاسدارێن ئیرانێ ئاشکرا دکەت، تۆلڤەکرن د رێ دایە و ئارمانجا وان ژی ئێک خال ب تنێ نابیت، سوپایێ پاسداران ژی دێ تۆلا سولەیمانی د دەمەکێ گونجای دا ڤەکەت.
ھەروەسا حسێن قائانی، فەرماندارێ فەیلەقا قودس یا سەر ب سوپایێ پاسداران ڤە راگەھاند، تۆلڤەکرنا خوینا قاسم سولەیمانی دبیت د ناڤا ئەردێ ئەمریکا دا بیت، سەمتا مقاومی ژی ب کریارێن ئەمریکا ناھێتە گوھۆرین و ئیران بەرھەڤە تۆلێ ڤەکەت.
سوبە رۆژا ئێکشەمبی سالرۆژا ئێکێ یا کوشتنا قاسم سولەیمانی، فەرماندارێ فەیلەقا قودس یا سوپایێ پاسدارێن ئیرانێ و ئەبو مەھدی موھەندس، جێگرێ سەرۆکێ دەستەیا حەشدا شەعبی یا ئیراقێ یە، کو ل رۆژا سیێ مەھا کانوونا دویێ یا سالا بووری ژ ئالیێ فرۆکەیەکا ئەمریکا ڤە ل فرۆکخانەیا بەغدا ھاتبوونە کوشتن، بۆ وێ یەکێ ژی ئیران و میلیشیایێن سەر ب وێ ڤە ل ئیراقێ بەرھەڤیا ساخکرنا وێ رۆژێ دکەن، ھەموو پێشبینی ژی دھێنە کرن د وێ رۆژێ دا ئەو کارەکی وەکو تۆلڤەکرنا بکەن.
ئیراقێ و ئەمریکا ھۆشداری دانە ئیرانێ و میلیشیایێن وێ
ئیران: دێ تۆلا سولهیمانى د ناڤا ئاخا ئهمریكا دا ڤهكهین
