ئەپرەم یەلدا کریستانێ ئاکنجیێ کۆمەلگەھا بێریسڤێ یە سەر ب قەزا زاخۆ ڤە، ژ کەڤن دا و نڤش بۆ نڤشی کارێ دروستکرنا جلکێن کوردی دکەن ب تایبەت بەرگیزان .
دھەڤپەیڤینەکا خانی نیوز دا، یەلدایی دیارکر کو ژ مالباتەکا رەسەنن و کارێ وان یێ دروستکرنا بەرگیزان ڤەدگەریت بو سەدێ نوزدێ، نڤش بۆ نڤشی پیشە ھاتیە رادەستکرن و فێری کاری بووینە، نوکە ژی ژ سالێن ھەشتیان دا ئەو ڤی کاری دکەت و بەردەوامە.
ئەپرەم یەلدا گۆت: پیشەیا وان گەلەک زەحمەتە و بێھنفرەھی و دەمەک درێژ بۆ دڤێت ھەتا بشێن کارەکێ جوان و قوماشەکێ پاقژ دروست بکەن، لەوا ھەمی کەس نەشێن خوە دڤی پیشەیی دا ببینن، بو نموونە ھەر ژدەستپێکا دروستکرنێ ھەتا دگەھیتە بازاری دبیتە بەرگیز ھەیڤەک ھەتا ھەیڤ و نیڤا دەم پێ دڤێت.
یەلدای گۆت ژی: ھەمێ موویێن بزنان نابنە بەرگیز، ب تنێ جۆرەکێ موی ھەیە دبێژنێ مەرەز یا بزنا چڕ، ئەو موویە دھێتە شووشتن و ڤەچرین و شەکرن و رستن ھەتا دبیتە بوکرە ودێ ئێتە شوشتن و زوھاکرن، پاشان دێ ب کەرەستەیێ سترکێ ئێتە لێدان.
یەلدای گۆت: پشتی وان قۆناغان ب رێکا ئامیرێن تایبەت یێن کەڤنار دھێتە دادڤ داڤ کرن و قالب دان، پشتی وێ یەکێ دبەنە بازاری و دھێتە فرۆشتن.
ل گۆرەی گۆتنا ئەپرەم یەلدای، ھەرجورەکێ بەرگیزان بازارەک ھەیە وەک (پشت پەز، مەرەز، سپی، بەکربەگی، بادایی و کەڕانی ) ئەو دکەنە قوماش و پاشان ب ڕێکا درینگەھان بۆ وان کەسێن حەز ھەیی دھێنە دروین و ل بەر خوە دکەن .
خانى نیوز، نزار مه‌جید گولى، زاخۆ
