سەرۆکوەزیرێن ھەرێما کوردستانێ راگەھاند، دەستدرێژییا ل سەر گەشتیارێن ژێری و ناڤەراستا ئیراقێ ل ناڤا ھەرێما کوردستانێ ب توندی شەرمزار دکەن کو ژ بەھا و رەوشتێن بلندێن جڤاکا کوردستانی دوورن.
مەسروور بارزانی، سەرۆکوەزیرێن ھەرێما کوردستانێ پەیامەک ل دۆر ھێرشکرنا ل سەر سێ پاسێن گەشتیارێن دەڤەرێن ژێری و ناڤەراستا ئیراقێ ل ناڤا ھەرێما کوردستانێ بەلاڤ کر و راگەھاند، ب مخابنی ڤە چەندین رۆژێن بووری چەندین روودانێن دوور ژ رەوشت و تیتالێن جڤاکێ کوردستانێ روودان و چەندین کەسێن تێکدەر ھێرش کرییە سەر گەشتیارێن بەغدا و پارێزگەھێن دیێن ئیراقێ، یێن بۆ بووراندنا سەرێ سالێ ھاتینە ھەرێما کوردستانێ، وان دەستدرێژییان ب توندی شەرمزار دکەن کو دوورن ژ بەھا و رەوشتێن جڤاکا کوردستانێ.
مەسروور بارزانی ئاماژە ب وێ یەکێ کر، ھەرێما کوردستانێ د سالێن بووری دا و تا نھا پەناگەھەکا ئارام بوو بۆ ملیۆنان ئاوارە و پەنابەرێن پارێزگەھێن ئیراقێ و وەلاتێ دەوروبەر و ھەردەم بێ جوداھی دەرگەھێن خوە بۆ مێھڤانان ڤەکرینە و حەواندینە، ھەروەسا بەردەوام ب سەدان ھزار گەشتیار قەستا کوردستانێ دکەن و ب رێز و ڤیان پێشوازی لێ ھاتیە کر، لەورا ئەو روودانێن ڤێ داویێ ژ رەوشت و کولتورێ لێبۆرینێ و پێکڤەژیان و مرۆڤدۆستییا خەلکێ کوردستانێ دوورن.
مەسروور بارزانی، سەرۆکوەزیرێن ھەرێما کوردستانێ ل داویا پەیاما خوە راگەھاند، ھەر کەسێ بزاڤا تێکدان و نەشرینکرنا وی کولتورێ بلندێ جڤاکا گوردستانی بدەت، دێ رێکارێن توند یێن قانوونی ھمبەری وان گرنە بەر.
پەیاما مەسروور بارزانی کو ل شەڤا سەرێ سالێ ل ھەولێرێ و ئەڤرۆ ژی ل باژارێ ئاکرێ چەند کەسان ب بەر و داران ھێرش کرە سەر پاسێن گەشتیارێن ئیراقی و جامێن ترۆمبێلێن وان شکاندینە.
ژ ئالیێ خوە پارێزگارێ ھەولێری و رێڤەبەرییا گەشتوگوزارا ئاکرێ ژی ئەو ھێرش شەرمزار کرینە و ب دوور ژ رەوشت و تیتالێن جڤاکێ کوردستانی ب ناڤ کرینە.
