چار گومرکێن فێقی ل پارێزگەھا دھۆکێ ھەنە، ب تنێ ل گومرکا سێمێلێ رۆژانە 1000 تەنێن فێقی و زەرزەواتی ژ دەرڤەی ھەرێمێ دھێنە ڤێ گومرکێ، بەرھەمێ وان ب رێژا ٨٥% بیانی یە و ١٥% یێ ناڤخوە یە.
ئاوات عەلی سالح، ئەندازیارێ چاندنێ یێ پێشکەفتی و نوونەرێ رێڤەبەریا گشتی یا چاندنێ ل گومرکێن فێقی و زەرزەواتی ل سێمێلێ بۆ خانی نیوز گۆت: وەرزێ زڤستانێ گەلەک زەرزەوات ھەیە ب رێژا 85% یێ بیانی یە و بەرھەمێ ناڤخوە ژی بتنێ شێلم و کولندێ زەر و ھندەک کەسکاتی ھەیە، رۆژانە ھەتا 1000 تەنێن فێقی و زەرزەواتی ژ دەرڤە و تایبەت وەلاتێن ئیرانێ و تورکیا دھێنە ناڤ پارێزگەھا دھۆکێ، ژ وانا باجانسۆرک رۆژانە 100 تەن و خیار 60 تەن و کەلەمی و قەرنابیت ب گشتی رێژەکا مەزن دھێن.
ئاوات عەلی گۆت ژی: ھەر ئێک ژ سێمێل، ئاکرێ، زاخۆ و بەردەرش ل سنۆرێ پارێزگەھا دھۆکێ گومرک ھەنە و ب تنێ ل سێمێلێ رۆژانە 1000 تەنێن زەرزەواتی و فێفی دھێن.
نوونەرێ رێڤەبەریا گشتی یا چاندنێ ئەو ژی دیارکر، ل ھەیڤا پێنچ ھەر ئێک ژ باجانسۆرک، خیار، فلفل و کولندێ دەرڤە دھێنە قەدەغەکرن، ژبەرکو بەرھەمێ ناڤخوە دگەھیت و نھا چ قەدەغە نینن ژبەرکو بەرھەمێ ناڤخوە نینە.
ناڤبری گۆت ژی: پێشتر ئاریشە ل گەل ھندەک گومرکان ھەبوون و پشتی قەدەغەکرنا سێڤا بیانی ژی ھەر ئەو سێڤێ دئینن، پشتی ئەو گومرکێن فێقی سزاداین ھەتا ئاستەکی کونترۆل ل سەر ھاتیەکرن.
نوونەرێ رێڤەبەریا گشتی یا چاندنێ ل گومرکێن فێفی گۆت ژی: بەرھەمێن دھێتە گۆمرکێن دھۆکێ ب رێژا 40% بەرھەمێ ئیرانێ یە، 30% یێ تورکیایە و رێژا دی بەرھەمێ ئەفریقیا و وەلاتێ مسرێ و چەند وەلاتێن دی یە.
خانی نیوز، سالار محەمەد دۆسکی:
