مامۆستایه‌كێ زانكۆیێ ئاشكرا دكه‌ت، ڤایرۆسێ كۆرۆنا كێشه‌یێن جڤاكی و ئابووری زێده‌كرینه و یا گرنگه خوه د گه‌ل ره‌وشێ بگونجینن و ره‌وشت و تیتال بهێن گوهارتن.
ھلۆڤان حسنی، مامۆستایێ زانکۆیێ بۆ خانی نیوز راگه‌هاند: ژ ئەگەرێ به‌لاڤبوونا ڤایرۆسێ كۆرۆنایێ، رەوشەکا دژوار ھاتیە پێش و کارتێکرنەکا مه‌زن کریە سەر کەرتێ ئابووری، ئه‌و یه‌ك ژى بوویە ئەگەرێ په‌یدابوونا چەندین ئاریشه‌یێن جڤاکی، گۆت ژى: یا گرنگ د ڤێ ره‌وشێ دا خوه گونجاندن و گوھۆرینا ره‌وشت و تیتالانه یێن كو بەری نھا دگۆتن نابیت و ناچیبیت، دڤێت د ڤێ ره‌وشێ دا د گەل ڤان قه‌یرانانا دا ب ریڤە بچن و پشتی قه‌یرانێ ژی بەردەوام بن.
هلۆڤان حسنی گۆت ژی، هەردەما کریزەکا ئابووری پەیدادبیت پێدڤیە نەریتێن مەزاختنا داھاتی بھێنە بکارئینان، ئەڤە ژ خالێت ھەرە گرنگە کو ل گورەی داھاتی مەزاختنێ بکەین.
هلۆڤان حسنی دیار ژى كر، خالا دی یا گرنگ ئه‌وه ئەقلیەتا راکرنا داھاتی بۆ مفاوەرگرتن ل پاشەروژێ یه، مخابنی ڤە ھەر پارەکێ دگه‌هیته بەردەست پتریا جاران بۆ تشتێ نە پێدڤی بكاردئینن.
مامۆستایێ زانكۆیێ خویا ژی كر، دڤێت رێکخستنەک دخەرجکرنا داھاتی دا هه‌بیت دا کو جڤاک د دەلیڤێن بەرتەنگ دا تووشی قه‌یرانێن ئابووری نەبیت، هه‌روه‌سا دەما قه‌یران پەیدادبیت، نابیت تاک پشت بەستنێ ل سەر ئێک ژێدەر بکەت بۆ ب دەست ڤە ئینانا داھاتێ رۆژانە بۆ ب رێڤەبرنا ژیانێ.
