سه‌رۆك وه‌زیرێن ئیراقێ راگه‌هاند، ئیراق نابیته گۆره‌پانا ململانێ یا هه‌رێمی و جیهانى و هێزێن زێده یێن ئه‌مریكا دێ ژ ئیراقێ هێنه ڤه‌كیشان.
مسته‌فا كازمى، د سالڤه‌گه‌را دامه‌زراندنا سوپایێ ئیراقێ دا گوتاره‌كێ دا راگه‌هاند؛ پاراستنا سه‌روه‌رییا ئیراقێ دێ بریارا ئیراقییان بخوه بیت، ژ ئه‌ڤرۆ وێڤه ئیراق نابیته گوره‌پانا ململانێ یا هه‌رێمى و جیهانى و ده‌رفه‌تێ ناده‌ت ئاخا وێ د به‌رژه‌وه‌ندییا وه‌لاتێن دى دا بهێته بكارئینان، و سۆپایێ ئیراقێ د ئاماده‌باشیێ دایه بو بجهـ ئینانا ئه‌ركێن خۆه.
كازمى د گوتارا خوه‌دا راگه‌هاند، ل رۆژا ئێكێ یا دانانا حكومه‌تا نوو دا تووشى ئاسته‌نگێن مه‌زن بووینه ب شێوه‌یه‌كى د دیرۆكا هه‌ڤچه‌رخا ئیراقى دا روونه‌داینه، د سه‌ر دا ڤایرۆسێ كۆرۆنایێ و قه‌یرانا دارایى ژی كو ژ ئه‌گه‌رێ وان بهایێ په‌ترۆلێ گه‌له‌ك داكه‌فت، هه‌روه‌سا قه‌یرانا مه‌زن یا خوه‌نیشاندانێن شۆره‌شا تشرینێ.
ل دۆر ڤه‌كێشانا هێزێن ئه‌مریكا ژ ئیراقێ دیاركر، وی د سه‌ره‌دانا خوه دا بۆ واشنتۆن به‌حسێ وێ پرسێ كرییه و ل گوره‌ى خشته‌یێ دیاركرى، د ده‌مێ چه‌ند مه‌هێن بوورى و د چه‌ند روژێن بهێت دا هێزێن زێده یێن ئه‌مریكا دێ هێنه ڤه‌كێشان، و نێزیكى نیڤا هێزێن وان دێ ژ ئیراقێ هێنه ڤه‌كیشان. بتنێ چه‌ند سه‌د كه‌سه‌ك دێ مینن بۆ هاریكارى، مه‌شق و راهێنان و پرچه‌ككرن و پشته‌ڤانییا ته‌كنیكى و ل گۆره‌ى رێكه‌فتنا هه‌ردوو وه‌لاتان، ئه‌و هێزێن ژ ئیراقێ ده‌ردكه‌ڤن دێ ل ده‌رڤه به‌لاڤبن.
