بزاڤێن راستڤەکرنا دەستوورێ ئیراقێ ل بەغدا دھێنە کرن، چاڤدێرەکا سیاسی ژی دبێژیت، ترسەکا رژد ل سەر پێگەھێ ھەرێما کوردستانێ ھەیە و دەستێن دەرڤە ژی تێدا ھەنە کو سیستەمێ فیدرالی نەمینیت.
نەدا مێرگەسۆری، چاڤدێرا سیاسی بۆ خانی نیوز دیارکر، ئاراستەیەکا ب ترس ل بەغدا یا لڤینان دکەت ژبۆ راستڤەکرنا دەستووری و مەرەما وان ژی ژ راستڤەکرنا دەستووری ئەوە فیدرالیەت ل ئیراقێ نەمینیت، راستە ترسەکا مەزن یا ھەی جارەکا دی ئیراق ببیتە دەولەتەکا مەرکەزی و مەزھەبی، ئەڤە ژی نیشانە کو ترس ل سەر پێکەھێ ھەرێما کوردستانێ پەیدابوویە، ب ھەموو شێوەیەکی دژایەتیا ھەرێما کوردستانێ دھێتەکرن.
نەدا مێرگەسۆری ئاماژە کر، پشتی پێکئینانا کابینا نھا یا حوکمەتا ھەرێما کوردستانێ شاندەکێ ھەرێمێ ب سەرۆکایەتیا مەسروور بارزانی سەرەدانا بەغدا کر، دا نیازپاکییا ھەرێما کوردستانێ نیشا بەغدا بدەت بۆ چارەسەرکرنا ئاریشەیێن ناڤبەرا ھەردو ئالییان، لێ مخابن دەرکەفت ل بەغدا نیازەکا گەلەک خراب ھەیە ھمبەری ھەرێما کوردستانێ.
نەدا مێرگەسۆری گۆت ژی: حکومەتا ئیراقێ ب سەرۆکایەتیا مستەفا کازمی دخوازیت ئاریشەیێن دگەل ھەرێما کوردستانێ چارەسەر بکەت، لێ دەستھەلاتێن کۆتلەیێن سیاسی زێدەترن ژ دەستھەلاتێن حکومەتێ و ناھێلن ئاریشە بھێنە چارەسەرکرن، ئەجێندایێن دەرەکی ژی رۆل د دژایەتیا ھەرێما کوردستانێ ھەیە، لەورا پێدڤیە کورد ئێکگرتی بن ھەمبەر ئەڤان بزاڤێن دژی ھەرێمێ دھێنەکرن.
خانى نبوز، قائید میرۆ، ھەولێر:
