هشیار زێبارى، ئه‌ندامێ مه‌كته‌با سیاسى یا پارتى و وه‌زیرێ به‌رێ یێ ده‌رڤه‌یێ ئیراقێ بۆ میدیایێن ئیراقێ راگه‌هاندییه: دائێخستنا بالیۆزخانا ئه‌مریكا ل ئیراقێ كاره‌كێ مه‌ترسیداره و دێ بیته ئه‌گه‌رێ ڤه‌قه‌تیانا ئیراقێ ل جیهانێ.
زێبارى ئاماژه ب وێ چه‌ندێ ژى كر كو دائێخستنا بالیۆزخانا ئه‌مریكا ل ئیراقێ دێ ڤالاهییه‌كا دیبلۆماسى یا مه‌زن بۆ وى وه‌لاتى دروست كه‌ت و دێ كاریگه‌رییه‌كا زۆر مه‌ترسیدار هه‌بیت.
ناڤهاتى گۆت ژى: ئه‌گه‌ر ئه‌مریكا بالیۆزخانا خۆ ل ئیراقێ دابێخیت، پشتى وێ ژىدێ سه‌رجه‌م وه‌لاتێن ئه‌وروپى و نه‌ته‌وێن ئێكگرتى، دێ دیبلوماتكار و بالیۆزخانێن خۆ ڤه‌كێشن و دێ كاریگه‌رییه‌كا مه‌زن كه‌ڤیته سه‌ر لایه‌نێ ئابوورى و زێده‌بوونا ئالوزیان و ئاریشێن ئه‌مریكا و ئیرانێ دناڤ ئاخا ئیراقێ دا.
زیبارى ئه‌و مه‌ترسییه ژى ئاشكه‌را كر كو دائیخستنا بالیۆزخانا ئه‌مریكا و مه‌زنبوونا ئالۆزیێن ناڤبه‌را ئیرانێ و ئه‌مریكا دێ كاریگه‌رێن مه‌زن هه‌بن ل سه‌ر هه‌موو سه‌كته‌رێن ئیراقێدا.
سه‌باره‌ت ئاریشێن هه‌رێما كوردستانێ و حكومه‌تا ناڤه‌ندى، ئه‌و سه‌ركردێ بالایێ پارتى جه‌ختكرییه، دڤێت هه‌ردوو لایه‌ن رێكبكه‌ڤن و خه‌لك و كۆمپانى مافێن دارایێن خۆ وه‌ربگرن، پێدڤى ناكه‌ت ژى هه‌ر هه‌یڤێ شانده‌ك بچیت بۆ داتنوستاندنێ و یا بێ مفا بیت.
