پشتی کو ل ڤان رۆژێن بۆری ھندەک روودانێن خۆکوشتنێ رووداین؛ بوویە جھێ نەرەحەتییێ د ناڤا جڤاکی دا، بەرپرسەکا ئافرەتان ژی ڤێ یەکێ ب مەترسی ل سەر جڤاکی دبینیت.
ئاخچین دۆسکی بەرپرسا ئەنجومەنێ ئافرەتێن قەزا ئامێدیێ بۆ خانی نیۆز راگەھاند: خۆ کوشتنا کچ و ژنان یا بوویە دیاردەیەکا بەربەلاڤ و مەترسیێ ل سەر جڤاکی پەیدا دکەت، ئەگەر ژی ڤەدگەریت بۆ ژییێ سنێلەیێ کو کچ نەشێن ل سەر نەخوشی و ئاستەنگێن ژیانێ دا زاڵ ببن و دەور و بەرێن خۆ ژی ژ ئاریشەیێن خۆ ھایدار ناکەن کو ئاریشێن وان چارەسەربکەن، لەورا توشی خەموکییێ و بێزاریێ دبن و پەنایێ دبەنە بەر خۆکوشتنێ.
ناڤھاتیێ دیارکر ژی: تا نھا ژی هندەک داب و نەریتێن شاش دبنە سەدەما رێگریکرنێ ل ھەمبەر پێشڤەچوون و پێشکەفتنا ژنان کو د خێزانێ دا جوداھییەکێ دناڤبەرا خۆ و کوران دا دبینن و رێ ب وان ناھێتە دان ب ئازادانە بۆچوونێن خۆ دەرببرن ئەڤە ژی دبیتە جھێ بێزارییا وێ.
ئاخچینێ گۆت ژی: دڤێت زەلام ھایکار و پشتەڤانێ ژنێ بیت دوور ژ ھەر رەفتارەکا توند بەرامبەر ژنێ، ژبەرکو د ژیانێ دا ھەردوو تەمامکەرێن ئێکن.
ل دووماھیێ ئاخچینێ داخواز ژ مەدیایێ و رێکخراوێن جڤاکی کر کو ب رێکێن خۆ بزاڤا بەلاڤکرنا ھشیارییا جڤاکی بکەن و ئەڤێ دیاردەیێ بنبڕ بکەن.
خانی نیۆز، سامی رێکانی
