وەزیرێ ژێدەرێن ئاڤێ یێ ئیراقێ راگەھاند، وان رەشنڤیسێ پرۆتۆکۆلا ھاریکارییان د بوارێ ئاڤێ دا رادەستی تورکیا کرییە، و ھۆشداری ژ ئەگەرێ رێکنەکەفتنێ دگەل وی وەلاتی دا.
مەھدی حەمدانی، وەزیرێ ژێدەرێن ئاڤێ د لێدوانەکێ دا راگەھاند، وان رەشنڤیسێ پرۆتۆکۆلا ھەڤکارییان د بوارێ ئاڤێ دا کو ڤان داوییان ژلایێ جڤاتا وەزیرێن ئیراقێ ھاتییە پەسەندکرن؛ رادەستی تورکیا کرییە، ئەو رەشنڤیس بەردانا ئاڤا پێدڤی ب ھەماھەنگی دگەل تورکیا ب خۆەڤە دگریت.
دیار ژی کر، لایەنێ تورکیا پێدڤی ب دو ھەیڤان ھەیە بۆ خواندنا وی پرۆتۆکۆلی لێ ھەردوو لایان خواستا راستەقینە بۆ چارەسەرکرنا دۆسەیا ئاڤێ ھەیە.
مەھدی حەمدانی ھۆشداری ژ ئەگەرێ نەگەھشتنا رێکەفتنێ دگەل تورکیا دا و راگەھاند، ئەگەر دگەل تورکیا رێکنەکەفتن، ئیراق دی رووبروو کیشا کێم ئاڤییێ بیت.
دھێتە پێشبینیکرن ل ١٥، ڤێ ھەیڤێ مەھدی حەمدانی وەزیرێ ژێدەرێن سرۆشتی ب سەرۆکاتییا شاندەکی بۆ گوتوبێژان ل سەر رەشنڤیسێ پرۆتۆکۆلا ھەڤکارییان د بوارێ ئاڤێ دا سەرەدانا تورکیا بکەت.
