وەزارەتا باژێرڤانیێ و گەشت و گوزار یا حکومەتا هه‌رێمێ ئەڤرۆ راگەھاند: ب ئەگەرێ چاکسازیکرنێ ل گرێبەستێن پاقژکرنێ، سالانە دێ حەفت ملیار دینار بۆ حکومەتێ ڤەگەرن.
وەزارەتێ د راگەھاندنەکێ دا گۆتییە: د چوارچوڤێ چاکسازیێن کابینا نەھێ یا حکومەتا ھەرێما کوردستانێ، وەزارەتا باژێرڤانی و گەشت و گۆزاریێ دێ ئاریشا کۆمکرنا گلێش و بەرمایکان ل باژێرێ ھەڤلێرێ و دەوروبەرێن وێ چارەسەر کەن، ئەڤە ژی پشتی کو گرێبەست دگەل چەندین کۆمپانێن ناڤخۆیی گرێداین، ھەروەسا ئەڤە پێنگاڤە دێ بیتە ئەگەر کو سالانە ٧ ملیار دینار بۆ خزینا حکومەتێ ڤەگەرن و کوالێتییا پاقژکرنێ ژی دێ بلندتر بیت، ئەڤە ژی ئێک ژ دەستکەفتێن کابینا نەھێ یا حکومەتا ھەرێما کوردستانێ یە.
پروسێسا تەندەرینگ ل ھەڤلێرێ و ل دویڤ راگەھاندنێ چ کێماسی تێدانەکرینە و لدویڤ یاسا و رێنمایێن گرێبەستا گشتی یا سالا ٢٠١٦ێ و پشکدارییا ٢١ کۆمپانیێن خۆمالی ھاتنە ئەنجام دان، گرێبەستێن کەڤن ژ یێن پاقژکرنێ ل ٣١-١٢-٢٠٢٠ێ ب دووماھیک ھاتبوون.
د گرێبەستا نوی ژی دا، ژبلی ڤەگەریانا ٧ ملیاران، ژلایێ ھونەری ژیڤە، چەندین زونێن پاقژکرنێ زێدەکرینە و سیستەم (جی پی ئێس) ژی بۆ چاڤدێریکرنا رێکا کارکرنا ئامیران دێ ھێنەدانان و کوالیتییا پروسێسێ ژی ب گشتی دێ گۆرانکاری ب سەردا ھێن، وەکی بلندکرنا مۆدێلا ترومبێلێن خزمەتگۆزاریێ بۆ مودیلا ٢٠١٨ و کۆنترۆلکرنا دیاردا ھاڤێژتنا بەرمایکێن ئاڤاکرنێ و چاڤدێریکرنا ڤان جۆرە بەرمایکان، دگەل دامەزراندنا بنگەھەکێ ناڤەندی بۆ کۆمکرنا بەرمایکان و ڤەگوھاستنا وێ بۆ زبلخانێ.
