جڤاتا بلندا ئابووریا ھەرێما کوردستانێ ب سەرپەرشتیا مەسرۆر بارزانی سەرۆکێ حکومەتا ھەرێما کوردستانێ ئەڤرۆ ١٢-١-٢٠٢١ێ کۆمبوو و د کۆمبوونێ دا دانوستاندن سەبارەت ھێلێن گشتی یێن پرۆژە یاسایا بودجا سالا ٢٠٢١ێ یا ھەرێما کوردستانێ و پێنگاڤێن پرۆژێ چاکسازیێ ھاتنەکرن.
ھەر ئێک ژ ئاوات شێخ جەناب وەزیرێ دارایی و ئابووری، ھەروەسا دارا رەشید وەزیرێ پلاندانێ راپورتێن خۆ دەربارەی رەوشا نوکە یا دارایی و بەرھەڤیێن پرۆژە یاسایا بودجا ٢٠٢١ێ بەرچاڤکرن.
د کۆمبوونێ دا سەرۆکێ حکومەتێ ئاماژە ب وێ چەندێ دا، کو حکومەتا ھەرێمێ ھەموو بزاڤان دکەت داکو رێکخستنا داھاتی و کێمکرنا خەرجیێن نە پێدڤی و رێکخستنا میلاکی و دەرێخستنا ناڤێن وان کەسان کو ب شێوەیەکێ نە رەوا د سوود مەندبوون ژ بودجا گشتی دا، داکو مافێن دارایی یێن مووچە خوران گەرەنتیکەن، و جەخت ژی کر کو پێدڤییە ھەموو ئەرکێن دبودجا ٢٠٢١ێدا ل بەرچاڤ بھێنە وەرگرتن و بودجەیەکا واقیعی و شەفاف بیت و پشت ب ژمارە و داتا و داھاتێ نەفتێ و خەرجیێن راستەقینە و کورتئینان و رەوشا دارایی یا نوکە یا ھەرێما کوردستانێ ب بەستیت، پشتی کو دھێتە پەسەندکرن ژی ل جڤاتا وەزیران، پاشی دێ ھێتە رەوانەکرن بۆ پەرلەمانێ کوردستانێ.
سەرۆکێ حکومەتێ دووپات ژی کرییە کو ھەرێما کوردستانێ بۆ چارەسەرکرنا ئاریشان دگەل حکومەتا فیدرال، دێ ھەموو ئەرکێن دەستووریێن خۆ جێبەجێکەتن، دڤێت دەستھەلاتا فیدرال ژی ھەموو مافێن دارایی یێن ھەرێمێ د چوارچووڤێ پرۆژێ بودجا فیدرال بۆ سالا ٢٠٢١ێ دابین بکەت.
