بالیۆزێ ئێكه‌تییا ئه‌ورۆپا ل ئیراقێ راگه‌هاند، ئه‌و بزاڤان دكه‌ن ئیراقێ ژ لیستا وه‌لاتێن گه‌له‌ك مه‌ترسیدار بیننه‌ده‌ر.
ل گۆره‌ى راپۆرته‌كا روژناما سه‌باح یا ئیراقى، مارتن هۆت، بالیۆزێ ئیكه‌تییا ئه‌ورۆپا ل ئیراقێ ب وان راگه‌هاندییه سه‌قامگیرى و خۆشگوزه‌رانى یا ئیراقێ مه‌رجێ سه‌ره‌كى یێ ب ده‌ستڤه‌ئینانا ئاشتى و ئارامییێ یه ل هه‌مى ده‌ڤه‌رێ، گاڤێن حكومه‌تێ ژى بۆ هه‌لبژارتنێن پێشوه‌خت ب گرنگ زانن.
بالیۆزێ ئێكه‌تییا ئه‌ورۆپا راگه‌هاند ژى، ئێكه‌تییا ئه‌ورۆپا هه‌موو بزاڤان دكه‌ت بۆ ده‌رخستنا ناڤێ ئیراقێ ژ لیستا وه‌لاتێن مه‌ترسیدار ل جیهانێ.
ل هه‌یڤا گولانا سالا بوورى، ئێكه‌تییا ئه‌ورۆپا لیسته‌ك ب ناڤێ وان وه‌لاتان به‌لاڤكر یێن مه‌ترسیدار ل سه‌ر داراییا ئێكه‌تییا ئه‌ورۆپا ژ ئه‌گه‌رێ خه‌مسارییا وان ل رێگریكرنێ ل سپیكرنا پاره‌ى و پاره‌داركرنا رێكخستنێن تیرۆرێ.
ئیراق ژى ئیك بۆ ژ وان وه‌لاتان و هه‌ر ئێك ژ وه‌لاتێن ئه‌ڤغانستان و سووریا و پاكستان و یه‌مه‌ن و ئیران و كۆریا باكوور ژى د لیستێ دا بوون.
