پشتی بریارا وهزارهتا پەروەردێ كو ژبەر رەوشا ڤایروسێ کورونایێ خاندن ل قوناغێن دەستپێکی و بنەڕەتی کریە ئۆنلاین و گوندێن کو ھێلا ئینتەرنێتێ نەبیت دێ دەواما درست کەن، لێ ھەژمارەکا قوتابیێن پۆلا دوازدێ ل سنورێ ناوچەدارییا باتیفا ژبەر نەبوونا ھێلا ئنتەرنێتێ نەشێن بخوینن .
(جەمیل محەمەد یەزدین) کو وەلاتییەکێ وێ دەڤەرێ یە بۆ خانی نیوز دیارکر: ل گوندێن زرێزە و دێمکا و گرێ بیێ مە ئاریشەیا قوتابیێن قوناغێن دەستپێکی و بنەرەت نینە چونکی ھەکە دەوام د ناڤا قوتابخانێ دا ھەبت دێ دەواما ئاسایی کەن ژبەرکو ھەژمارا وان کێمە، لێ قوتابیێن پۆلێن دوازدێ ژبەر نەبوونا ھێلێن ئینتەرنێتێ نەچارن ڕۆژانە ژ گوندی قەستا ناوچەداریێن باتیفا و زاخۆ بکەن دا بشێن بخوینن.
ناڤھاتی گۆت ژی: نێزیکی پێنجی قوتابیان ل پولادوازدێ نە ئەڤە ژی دبیتە بارگرانی و ھەمیان ژی ئەو شیان نینە.
دەربارەیی ڤێ چەندێ مە پەیوەندی ب ئۆفیسا کۆمپانییەکا گرێدایی ھێلا ئنتەرنێتی کر نەڤییا ناڤێ خوە بێژت گۆت: وان چ ئاریشە نینن ب تنێ ھەکە ئەو کۆمپانیا بورج ل ھنداڤی گوندێ زرێزە ھەیی رازی ببت ئامیرێن خوەیێن گەھاندنێ ب بۆرجێ وان ڤە بکەین دێ ئنتەرنێت ب ساناھیی گەھیت.
دڤێ دەربارەی دا خانی نیوز پەیوەندی ب ڕێڤەرییا ناوچەدارییا باتیفا کر، دلشێر عەبدولستار ڕێڤەبەرێ ناوچەدارییا باتیفا راگەھاند: دەڤەرا باتیفا دەڤەرەک سنوری یە و بوویە مەیدانا شەرێ د ناڤبەرا پەکەکێ و تورکیا دا، ژبەرھندێ ژی ل گەلەک گوندان کۆمپانیێن گرێدایی ھێلێن تەلەفونێ و ئینتەرنێتێ نەشیاینە وان خزمەتگوزارییان بگەھینن، بۆ ڤی بابەتی مە دگەل پەروەردا زاخۆ و کۆمپانیان ئاخفتییە کو چارەک بھێتە دیتن داکو قوتابی و خەلکێ دەڤەرێ ژتەکنولوژیا سەردەم مفادار دبن ، لێ ھێشتا بابەت وەک خوە مایە.
خانى نیوز، نزار مهجید
