محەممەد کەریم ئەلخەفاجی، وەزیرێ چاندنێ یێ ئیراقێ پێشوازی ل شاندەکێ حکومەتا ھەرێما کوردستانێ کر، ئەڤرۆ سێشەمبی د کۆمبوونەکا ھەڤپشک دا ل بنگەھێ وەزارەتا چاندنێ ل بەغدا، وەزیرێ چاندنێ یێ ئیراقێ دگەل وەزیرا چاندن و ژێدەرێن ئاڤێ ل ھەرێما کوردستانێ بێگەرد تالەبانی کۆمبوو و دانوستاندن ل سەر چەوانییا پاراستنا بەرھەمێ ناڤخۆیی و ئەو رەوشا کەرتێ چاندنێ تێدا دبۆریت ل وەلاتی ھاتەکرن.
د کۆمبوونێ دا جێگر و شیرەتکارێن ھەردوو وەزارەتان ئامادەببوون و دگەل سەرۆکێ ئێکەتییا گشتییا رێکخراوێن جۆتیاران و سەرۆکێ رێکخراوا بەرھێمئینانا پەلەوەران و ھژمارەکا تایبەتمەندان دڤی بواری دا ئامادەبوون.
ھەر د کۆمبوونێ دا وەزیرێ چاندنێ یێ ئیراقێ ب پێدڤی زانی کو ھەڤشکی ھەبن د ناڤبەرا بەغدا و ھەرێمێ دا و ب تایبەت کەرتێ چاندنێ و پاراستنا بەرھەمێ ناڤخۆیی، و ئەو چەندە ژی دیارکر کو ئەڤ دیدارە ژی خالەکا گرنگە سەبارەت بەردەوامبوون و تێگەھشتنێ دگەل چاندنا ھەرێمێ و چەوانییا چەسپاندنا ھەر ئەرکەکێ کو ژ وەزارەتا چاندنا ئیراقێ دەربکەڤیت سەخمەراتی پاراستنا بەرھەمێ ناڤخۆیی.
و ژلایێ خۆڤە بێگەر تالەبانی بەرھەڤییا خۆ دیارکر بۆ ڤەکرنا لاپەرەکێ نوو سەخمەراتی پاراستنا بەرھەمێ ناڤخۆیی و پێکڤە رێگریێ ل کارێ قەچاخچیکرنێ ل ھەموو خالێن سنوری یێن ئیراقێ بکەن.
ھەروەسا تالەبانی داخواز ژ ئەلخەفاجی کر کو سەرەدانا ھەرێمێ بکەت داکو رێککەفتن ل سەر ھەموو خالێن ھەڤپشک بھێنە کرن و چارەسەریێن باش ببینن داکو بەرھەمێ چاندنێ و ناڤخۆیی بھێتە پاراستن ل ھەموو ئیراقێ.
