سەرۆکێ حکومەتا ھەرێما کوردستانێ بریارا بجھئینانا ھەژمارەکا پرۆژێن گرنگ ل سنۆرێێ پارێزگەھا دھۆکێ داینە و ل گۆرەی وان بریاران پارێزگارێ دھۆکێ بریار دا سێ پرۆژە ل سنۆرێ قەزا ئامێدیێ بکەڤنە د قۆناغا بجھئینانێ دا.
مللەت عسمەت، سکرتێرێ رۆژنامەڤانی یێ پارێزگارێ دھۆکێ ئاشکرا کر، د چارچووڤێ بریارێن مەسروور بارزانی، سەرۆکێ حکومەتا ھەرێما کوردستانێ بۆ بجھئینانا ھەژمارەکا پرۆژێن خزمەتکاری ل سنۆرێ قەزا ئامێدیی، دکتورعەلی تەتەر، پارێزگارێ دھۆکێ بریار دا سێ پرۆژێن خزمەتکاری بھێنە دەستپێکرن.
سکرتێرێ رۆژنامەڤانی یێ پارێزگارێ دھۆکێ ئاشکرا ژی کر، ئەو پرۆژە پێکھاتینە ژ دروستکرنا تۆرا ئاڤێ ل تاخێن شەھیدان، داستان، گوندێ بەلاڤ، تاخێ گۆلان ١ و گوندێ بەرچی، ل ناوچەداریا دێرەلۆکێ ب کۆژمێ ١٧٠ ملیۆن و ٩٩٨ ھزار دیناران، پرۆژێن دروستکرنا تۆرا ئاڤێ ل تاخێن مرێبکا و بلنیا مێرستەک ل دەڤەرداریا ئامێدیێ ب کۆژمێ ٢٢٧ ملیۆن و ٧١٤ ھزار دیناران و پرۆژێ سەخبێرکرن و قێرکرنا رێێن ناڤخوە ل تاخێ داستان و ئازادی ل ناوچەداریا دێرەلۆکێ ب کۆژمێ ٥٤٠ ملیۆن و ٦٤٦ ھزار دیناران.
پشتی سەرەدانا مەسروور بارزانی، سەرۆکێ حکومەتا ھەرێما کوردستانێ بۆ دەڤەرا ئامێدیێ، بریارا ھەژمارەکا پرۆژێن خزمەتکاری د وارێن ئاڤ، کارەب و رێک و پران و ھندەک پرۆژێن دی ھاتە دان، ھەژمارەکا وان پرۆژان ھاتینە بجھئینان و ھندەک ژی د قۆناغا بجھئینانێ دانە.
