ئاژانسا دەرمانا ل وەلاتێ نەرویژ راگەھاند، بیست و سێ وەلاتیێن وان پشتی وەرگرتنا ڤاکسینێ دژی کۆرۆنایێ گیانێ خوە ژ دەست دایە، ئەگەرێن مرنا سیزدە کەسێن ژ وان ژی بۆ کارتێکرنێن لاوەکی یێن وی ڤاکسینێ ڤەدگەرن، لێ ھەموو ژی د سەر ژیێ ٨٠ێ سالیێ دانە.
ل گۆرەی ئاگاھیێن میدیایا نەرویژی تا نھا بیست و سێ کەسان ل وی وەلاتی ب ئەگەرێ ڤاکسینێ فایزەر بایۆنتیک یێ دژی کۆرۆنایێ گیانێ خوە ژ دەست دایە، ژبەر وێ یەکێ ژی دەستھەلاتدارێن ساخلەمی بریار دایە گوھۆرینان د رێنمایێن کوتانا ڤاکسینی دا بۆ کەسێن دانعەمر بکەن.
ئاژانسا دەرمانان ل نەرویژ ئاشکرا ژی کر، ھەموو ئەو کەسێن گیانێ خوە ژ دەست داین د سەر ژیێ ٨٠ێ سالیێ دانە و بەرگرییا لەشێ وان یا لاواز بوو.
ل دۆر وێ یەکێ ژی شتاینار مادسن، پەیڤدارێ ب ناڤێ ئاژانسا دەرمانان ل نەرویژ ئاشکرا کر، گیان ژ دەست دانا وان کەسان ئەو دلگران نەکرینە، ژبەرکو ئەو دزانن ترسێن ڤاکسینی گەلەک کێمن و ب تنێ کارتێکرنێ ل کەسێن دانعەمر و یێن رەوشا وان یا ساخلەمی یا خراب دکەت.
