هژمارهكا مهرج و رێنمایێن نوو د چارچۆڤێ یاسایێ دا ل سەر مەرجێن پێشتر بۆ چاپکرنا پەرتوکان زێدەبوینە. (ئیسماعیل تاھر جانگیر) رێڤەبەرێ پەرتوکخانا بەدرخانییان بۆ خانی نیوز گوت: د سالا ٢٠٢١ێ دا چەند خالەکێن دی ل سەر خالێن پێشتر بۆ چاپکرنا پەرتوکان زێدە بووینە، یا پێدڤیە نڤیسەر و وەرگێر ژبۆ داخازکرنا مولەتا چاپکرنا پەرتوکێن خۆ پێگیریێ ب ڤان مەرجان بکەن.
ل دووڤ وان زانیاریێن رێڤهبهرێ پهرتوكخانا بهدرخانییان داینه خانى نیوز، رێنمایێن نوو یێن چاپكرنا پهرتوكان بریتینه ژ:
•دیارکرنا ژمارا بەرپهرێن پەرتوکێ.
•ناڤەرۆکا پەرتوکێ چ بابەت بخۆڤە دگریت.
•ئەگەر یا وەرگێرای بیت ناڤێ وەرگێری.
•ناڤێ وی دەزگەھێ بۆ ئێکەم جار پەرتوک لێ ھاتییە چاپکرن.
•پەرتوک ژ چ زمان ھاتییە وەرگێران.
•مافێ وەرگێرانێ ژ نڤیسەری ھاتییە وەرگرتن یان نە.
•ناڤ و ناسناما نڤیسەری.
•دانەکا وێ پەرتوکا دێ ھێتە چاپکرن ب شێوازێ PDF.
ئیسماعیل تاهرى بۆ خانى نیوز دیاكر ژى: ل دووڤ ڤان مەرجان پێدڤیە نڤیسەرێن دناڤ باژارێ دھۆكێ دا ڤان بەلگەنامان رادەستی مە بکەن. ههروهسا ئهو نڤیسەرێن ل دەرڤەی باژێرێ و ل دهڤهردارى و ناوچهداریێن سنورێ پارێزگەھا دھۆكێ دژین، دشێن ب شێوازێ ئەلکترونی داخازا مولەتێ بکەن.
دهێته زانین د سالا ٢٠٢٠ێ دا رێژا چاپکرنا پەرتوکان ل پارێزگەھا دھۆکێ نمرا پیڤای ب بەراورد ب حەفت سالێن دەرباز بووی داشکاند ، کو (٥٢٧) پەرتوک ھاتینە چاپکرن.
ل سالا (٢٠١٩) ژی ٤٥٠ پەرتوک بەرەف چاپێ چووبوون وەکو بەرھەمێ پارێزگەھا دھوکێ و ل سالا (٢٠١٥) كێمترین رێژا پەرتوکا ھاتبوونە چاپکرن کو ژمارا وان کێمتر بوو ژ (١٠٠) پەرتوکان.
خانی نیوز، مهتین عومهر
