ژنێن ئێزیدی یێن عەفرینێ راگەھاند: تورکیا ھەمان شێوازێ داعشێ ژ بۆ بنپێکرنا پیرۆزیێن وان یێن ئۆلى ل عەفرینێ بکاردئینیت.
سوعاد حەسۆ، سەرۆکا ھەڤپشکا ئێکەتییا ئێزیدی یێن کەرتێ عەفرینێ گۆت: تورکیا ھەمان شێوازێ داعشێ ل عەفرینێ بکاردئینیت، بەریا چەند رۆژان پیرۆزی و مەزارگەھـ و قوتابخانەیێن وان یێن ئۆلى ل گوندێ باسوفان یێ سەر ب ناحیا شیراوا خراب کرینە و ھەژمارەکا ژنێن ئێزیدی د گرتیخانەیێن تورکیا دا نە و ھەر یەک بەرانبەر 1500 یورۆیان دھێـت ئازاد کرن.
ژ ئالییەکێ دی ، گولێ جەعفەر، ئەنداما ئێکەتییا ئێزیدیان ل کەرتێ عەفرینێ گۆت: دەما ٣ سالانە داگیرکارییا تورکیا ل عەفرینێ بنپێکارییان ل دژی وەلاتییان دکەت، ب تایبەت ئێزیدیان کو زۆریێ ل وان دکەن دینێ خوە بگھۆرن و بسرمان ببن، ھەروەھا ب زۆری جلێن رەش ل بەر ژنێن ئێزدی دکەن و دەستدرێژیا سێکسی دگەل وان دھێت کرن و دکوژن.
سوعاد حەسۆ، داخواز ژ جڤاکا ناڤدەولەتی کر فشارێ بێخین سەر تورکیا تا کو داویێ ب دەستدرێژییا ل سەر ئێزیدیان بینن و رخنە ل نادیا موردا، بالیۆزا نیازپاکی یا نەتەوەیێن ئێکگرتی گرتن ژ بەر کو ل سەر دەستدرێژییا ئێزیدیێن عەفرینێ بێ دەنگە.
گۆت ژی: تورکیا غەزال سمۆ، وەلاتییەکا ٤٥ سالی ئەشکەنجە دایە تاکو ھزرا خوە ژ دەستدای، فاتما حەمکو ژی د مالا خوە ڤە بەرگری ل دژی داگیرکارییا تورکیا دکر و د مالا وێ ڤە ھات کوشتن، ھەروەسا دەستدرێژی ل سەر نێرگز داود و چەندین کچێن دی ھاتییە کرن.
