خولوسی ئاکار وەزیرێ بەرگری یا تورکیا ئەڤرۆ رۆژا دووشەمبی گەھشتە بەغدا و دێ دگەل بەرھەم ساڵح سەرۆککۆمار و مستەفا کازمی سەرۆکوەزیرێ ئیراقێ کۆمبیت.
ل گۆرەی زانیاریێن خانی نیوز: خولوسی ئاکار ل دووماھییا سەرەدانا بەغدا و کۆمبوونا دگەل بەرپرسان بریارە سەردانا ھەرێما کوردستانێ بکەت و دگەل بەرپرسێن بلند یێن ھەرێما کوردستانێ کۆمببیت.
(خولوسی ئاکار) وەزیرێ بەرگری یا تورکیا و (یاشار گولەر) سەرۆک ئەرکانێ سوپایێ تورکیا ل بەغدا دێ دگەل بەرھەم ساڵح و مستەفا کازمی و جومعە عیناد وەزیرێ بەرگریا ئیراقێ کۆمبیت و بەرھنگاربوونا تیرۆرێ و ھاریکارییا سەربازی و ئاسایشێ د ناڤبەرا ھەردوو وەلاتان دا دێ بابەتێ سەرەکی یێ کۆمبوونێ بیت.
بەری نوکە بریاربوو خولوسی ئاکار ل ١٣ێ ئابا ٢٠٢٠ێ سەرەدانا ئیراقێ بکەت، بەلێ ب ئەگەرا بۆردوومانێن فرۆکەیەکا بێ فرۆکەڤان یا تورکیا و گیان ژ دەستدانا دوو ئەفسەرێن پلە بەرزێن ھێزێن سنوورێ ئیراقێ، وەزارەتا دەرڤە یا ئیراقێ سەرەدانا خولوسی ئاکاری بۆ بەغدا ھەڵوەشاند.
