ژ ئەنجامێ گھۆرینا کەش و ھەوای و بارینا پێلێن بەفر و بارانێ و داکەتنا پله‌یێن گەرمێ، ڕێکێن سەرەکی یێن (زاخۆ – باتیفا – کانی ماسێ) ژ مژێ ھاتینە گرتن و ھاتن و چوون ب زەحمەت کەتییە، ل دۆر ڤێ چەندێ (بەشیر یوسف) ژ ڕاگەھاندنا پولیسێن هاتن و چوونێ ل زاخۆ بۆ خانی نیوز ڕاگەھاند: ل دەڤەرێن سنوری ژبەر ڕەوشا کەش و ھەوای ڕێکێن سەرەکی ب مژێ گرتینە، ئەو ھیڤیدارن ژ شوفێران ئەگەر بۆ کارەکێ فەر نەبیت ھاتن و چوونێ نەکەن، ب تایبەت ڕێکا باتیفا بۆ بێگۆڤا ژبەرکو مەودایێ دیتنێ کێمە.
ناڤھاتی ھیڤیخواست ژی: ل دەمێ ھەبوونا مژێ پێدڤییە شوفێر کێمترین لەزاتی ب کاربینیت، ھەروەسا ڕوناھیێن نزم یێن لایتێن ترۆمبێلا وی بهێنە ھەلکرن و ژ سایدێ خوە ل دووڤ ھێلا سپی یا جاددێ دەرنەکەڤیت داکو تووشی چ ڕویدانا نەبن.
خانی نیوز دووڤچوونا ڕێکێ کریە کو د نوکە دا ڕێکا سەرەکی یا باتیفا بۆ بێگۆڤا ب تەمامی مژێ گرتییە و پێشبینی دھێنەکرن د ئەڤ شەڤە دا ڕێکا زاخۆ بۆ باتیفا و کانی ماسێ ژی ژ ئەگەرێ ھەبوونا مژێ ب تەمامی بێتە گرتن.
خانی نیوز، نزار مەجید
