پشتی سەرەدانا وەزیرێ بەرگرییا تورکیا بۆ بەغدا، لژنا ئێمناھیێ ل جڤاتا نوونەرێن ئیراقێ راگەھاند، ڤەکێشانا ھێزێن تورکی ژ ھەرێما کوردستانێ ل کارێن پێشیێ یە بۆ بەغدا، ئیراق ژی بزاڤان دکەت رێککەفتنا د گەل تورکیا دا ھەلوەشینیت یا رێ ب سوپایێ تورکیا ددەت ب کووراتییا ٣٠ کیلۆمەتران بھێتە د ناڤ ئاخا ئیراقێ دا بۆ بەرھنگاربوونا گەریلبایێن پەکەکێ.
ل گۆرەی راپۆرتا لژنا ئێمناھیێ ل جڤاتا نوونەرێن ئیراقێ، بەغدا ژ سیاسەتا جۆ بایدن، سەرۆکێ نوو یێ ئەمریکا دترسیت کو پشتەڤانیێ ل سەرخوەبوونا کوردستانێ بکەت و دبیت ئەمریکا دانپێدانێ ب ئەنجامێن رێفراندۆما سالا ٢٠١٧ێ بکەت، لەورا بەغدا دخوازیت ھەماھەنگییا سەربازی د گەل ئەنقەرێ بھێز بێخیت وەکو بەرھەڤییەک بۆ وێ پرسێ ل پاشەرۆژێ.
پێشتر ئەندامەکێ جڤاتا نوونەرێن ئیراقێ ھۆشداری ژ پلانێن رەجەب تەیب ئەردۆغانی ل ئیراقێ دان و پێشبینی کر بوو کو سوپایی تورکیا دێ ئۆپەراسیۆنەکا مەزن ل ناڤا ئاخا ھەرێما کوردستانێ کەت.
ژ ئالییەکێ دی ڤە رۆژنامەیا لی فیگارۆ د راپۆرتەکێ دا ئاشکرا کر بوو، نھا بەرێ ئەردۆغانی کەفتییە ئیراقێ و دبیت ئۆپەراسیۆنێن خوە ل ناڤا ھەرێما کوردستانێ بەرفرەھـ بکەت و بنگەھێن سەربازی یێن ھەردەمی ئاڤا بکەت، ب بەھانەیا پاقژکرنا دەڤەرێن سنۆری ژ گەریلایێن پەکەکێ.
بەغدا و ئەنقەرە ژ سیاسەتا جۆ بایدنی دترسن
