دەستەیا گەشتوگوزارا هەرێما کوردستانێ پێشنیار کرییه، ئەگەر رەوش یا گونجای بیت فه‌ستیڤالا بەفرێ ل قەزا ئامێدیێ یا پارێزگەها دهوکێ بهێته كرن، جهێ وێ ژی دێ ل پارکا بەرێ سیلێ بیت لێ ئه‌و ته‌نێ پێشنیاره و هێشتا نه‌بوویه بڕیار.
نه‌زیف محه‌مه‌د عەلی رێڤەبەرێ گەشتوگوزارا ئامێدیێ بو خانی نیوز راگه‌هاند؛ دسالا 2020 دا 143720 گەشتیاران قەستا جهێن گەشتیاری یێن قەزا ئامێدیێ کریە كو 12 جۆرێن گەشتوگوزاری هەنە ژوان شینواری وئاینی، هونەری، رابوراندن وژینگەه وگەلەک جۆرێن دی هەروەسا وان 40 هوتێل وموتێل و کۆمەلگەهەکا گوزاری کونێزیکی 100 خانیێن گەشتیاری ل سنورێ قەزا ئامێدیێ هەنە .
نه‌زیف محه‌مه‌د گۆت ژی: د نها دا هوتێلا بەری ل سەرسنکێ ژ ئالیێ وەبەرهێنەرەکی دهێتە نویژەنکرن لێ کار ب سستی برێڤەدچیت ، هەروەسا بریار هاتییە دان پرۆژەیێ داڤەرستا چیایێ گارە ل گەلیێ سەرسنک بو گاروکی تا قەسرا چیایێ گارە بهێتە دروستکرن لێ تا نها کار تێدا نەهاتیە کرن .
رێڤەبەرێ گەشتوگوزارێ خویا ژی كر، هوتێلا سکەی ژئەگەرێ نەقەرەبووکرنا خەلکێ دهوتێلێ ڤە تا نها بوینە رێگر کو ئەو پرۆژە نەهێتە نویژەنکرن لێ بریار هاتیەدان ژ ئالیێ وەبەرهێنەرەکی ڤە بهێتە نویژەنکرن و دروستکرن .
نه‌زیف محه‌مه‌د دیار ژی كر، هەر چوار وەرزێن سالێ یێن وان گەشتو گوزارینە وگونجاینە ل هەموو سنورێ قەزایێ لێ ژ ئەگەرێ هەبوونا چەکدارێن پەکەکێ وبومبەرانان بەردەواما فروکه یێن تورکیا بووینە ئەگەر کو پتریا جهێن گوزاری نەهێنە دروستکرن و گەشتیار و وەبەرهێنەر قەستا ڤان جهان نەکەن بتنێ (15) جهێن گەشتیاری دکارانە ئەو ژی هەمی خزمەتگوزاری دباش نین بتایبەت رێکێن هاتن وچوونێ .
خانی نیوز، هەیوار ستار
