حەیدەر عەبادی سەرۆكێ هەڤپەیمانییا نەسر و سەرۆكوەزیرێن پێشتر یێ عیراقێ دپەیامەكێدا ئیدانەیا هێرشا سەر مالا نێچیرڤان بارزانی سەرۆكێ هەرێما كوردستانێ ل دهۆكێ كر و دیاركر، ئەڤە دەستدرێژییەكا مەترسیدارە و ئارمانج ژێ تێكدانا سەقامگێرییا وەلاتییە.
عەبادی د پەیاما خۆدا دیاركر، ئەڤ كارە ب تنێ وەكو دەستدرێژییەكا مەترسیدار دهێتە دیتن، دەست بۆ ئاسایش و سەقامگێرییا عیراقێ دهێتە درێژكرن، گەفە ل سەر ئاشتییا جڤاكی، ئەوان سیمبوولێن نیشتیمانی دكەتە ئارمانج یێن ڕۆلەكێ بەرچاڤ دچەسپاندنا لێكتێگەهشتنێ دناڤبەرا پێكهاتەیاندا گێرای.
سەرۆكوەزیرێن پێشتر یێ عیراقێ هەڤسوزییا خۆ بۆ سەرۆكێ هەرێما كوردستانێ و بنەمالا وی دەربری و ڕاگەهاند، ئەڤان جۆرە كاران چ پەیوەندی ب بهایێ كارێ سیاسی یان گیانێ بەرپرسیارەتییا نیشتیمانیڤە نینە، بەلكو ب تنێ بزاڤەكە بۆ تێكدانا ڕەوشا گشتی.
عەبادی د پشكەكا دییا پەیاما خۆدا داخوازا تەباییێ و سەرخستنا زمانێ دانوستاندنان و كارێ هەڤپشك بۆ پاراستنا عیراقێ ژ هەر گەفەكێ كر، هەڤدەم داخواز ژ لایەنێن پەیوەندیدار كر لێكۆلینەكا بلەز بۆ ئاشكراكرنا هووركارییێن ئەوێ ڕوودانێ بكەن و بكەرێن وێ ل دووڤ قانوونێ سزا بدەن.