ده‌مه‌كه نوورى مالیكى سه‌رۆك وه‌زیرێن به‌رێ یێ ئیراقێ و سه‌رۆكێ هه‌ڤپه‌یمانییا ده‌وله‌تا یاسا ب شێوه‌یه‌كێ راسته‌وخۆ و نه‌راسته‌وخۆ به‌حسێ وه‌رگرتنا پۆستێ سه‌رۆك وه‌زیران دكه‌ت، ئه‌ڤرۆ ژى سه‌ركرده‌كێ هه‌ڤپه‌یمانیێ دووپات ژى كر ڤه‌گه‌ریانا مالیكى د رێكێ دایه.
ئه‌ڤرۆ چوارشه‌مبى ئه‌بۆ ئه‌حمه‌د به‌سرى سه‌ركرده ل هه‌ڤپه‌یمانییا ده‌وله‌تا یاسا و كه‌سایه‌تییا نێزیكى مالكى وه‌رگرتنا پۆستێ سه‌رۆك وه‌زیرێن ئیراقێ بۆ جارا سیێ د رێكێ دایه.
به‌سرى د پرێسكونفرانسه‌كێ دا گۆت: رۆژ بۆ رۆژێ پشته‌ڤانێن مالیكى د زێده‌بوونێ دانه و ته‌خ و چینێن كۆمه‌لگه‌ها ئیراقى ژى وه‌سا هزردكه‌ن كو مالیكى گونجاوترین كه‌سه بۆ وه‌رگرتنا پۆستێ سه‌رۆك وه‌زیران د حكومه‌تا داهاتى دا.
سه‌ركردێ ده‌وله‌تا یاسا دوو هۆكار ده‌رباره‌ى پێدڤیاتییا ئیراقێ بۆ ڤه‌گه‌راندنا مالیكى بۆ سه‌رۆكایه‌تیكرنا حكوومه‌تێ دیاركرن، و ل دووڤ ئاخڤتنا وى ئێك ژ وان ده‌ستپاكیىا وى و یا دووێ ژى شاره‌زاییا وى د رێڤه‌برنا ده‌وله‌تێ دایه.
ئه‌ڤه ژى د ده‌مه‌‌‌كی دایه كو گه‌نده‌لیێن مه‌زن پشتى قوناغا 2003ێ ل ئیراقێ ل سه‌رده‌مێ حوكمرانییا مالیكی دا هاتینه كرن، و د سه‌ر وێ چه‌ندێرا ژى ژ ده‌ست دانا پشكه‌كا مه‌زن ژ ئاخا ئیراقێ د شه‌ره‌كی دا دگه‌ل هژماره‌كا كێم یا چه‌كدارێن رێكخراوا تیرۆریستێن داعش ل سالا 2014ێ هه‌ر ل سه‌رده‌مێ ویلایه‌تا مالكى بوویه.
