بنگەھێ چاڤدێرییا بازرگانی ل دەڤەردارییا ئامێدیێ د سالا ٢٠٢٠ێ پتری ٥ تەنێن کەل و پەلێن دەم ب سەرڤەچووی ھاتینەژناڤبرن و پتری ٨٠ جھـ ژی ھاتینەگرتن .
کاروان حاجی سەعید بەرپرسێ بنگەھێ چاڤدێرییا بازرگانی و سەرۆکێ لژنا ئابووری ل دەڤەردارییا ئامێدیێ بۆ خانی نیوز گۆت: د سالا بۆری دا وان پتری ٥ تەنێن کەل و پەلێن دەم ب سەرڤەچووی ژلای وانڤە ھاتینەژناڤبرن و پتری ٨٠ جھان ژی ھاتینەگرتن بۆ دەمێ سێ رۆژان، ھەروەسا پتر ژ ٤٠ جھان ژی ھاتینە سزادان کو سزایێن وان د ناڤبەرا ٥٠ ھزار تا وەکو ٢٠٠ ھزار دیناران ھاتینە سزادان و سۆزنامە ل سەر وان ھاتینە ئیمزاکرن کو ئەگەر ھاتوو دووبارە سەرپێچی کر، روو برووی دادگەھێ بھێنەکرن و بھێنەسزادان.
ناڤبری زێدەتر گۆت: ئەو بەردەوام دووڤچوونا بازاری وەکو دوکان و مارکێت و سەمونخانە و نانپێژییان دکەن ل سەنتەرێ ئامێدیێ و سنورێ ھەر شەش ناوچەدارییان یێن گرێدایی دەڤەرداریا وان دکەن ژبۆ مەرەما چاڤدێرییا بازاری ل سەر کەل وپەلێن دەم ب سەرڤەچووی ھەروەسا ئەو چاڤدێرییا گرانبوونا بھایێن بازاری دکەن کو بھایێن وان دگونجای بن ژبۆ ھەڤوەلاتیان، ھەروەسا داخازێ ژ خەلکێ خۆ دکەن کو وان ئاگەھداربکەن ژبۆ ھەرسەرپێچییەکێ وەکو گران بوونا بھایێ کەل و پەلان ھەروەسان کەرەستێن دەم ب سەرڤەچووی.
ئێک ژ وەلاتیێن ناوچەدارییا شێلادزێ ب ناڤێ (سەروان فائق) بۆ خانی نیوز گۆت: ژ ئەگەرێ گرانبوونا دۆلاری دناڤ بازاری دا بھایێ کەل و پەلان گران بوویە و ئەو داخازێ ژ حکومەتێ و لژنا چاڤدێرییا بازاری دکەن کو بھایێن دەست نیشانکری بۆ بھێنە دانان داکو بارگرانی ژبۆ خەلکی دروست نەبیت و بھایێن وان بھێنە جێگیرکرن.
دەڤەرداریا ئامێدیێ ئێک ژ مەزنترین دەڤەرداریێن سنورێ پارێزگەھا دھۆکێ یە ژلایێ رووبەریڤە ژی سنورێ وێ گەلەک بەرفرەھە و ژ شەش ناوچەداری و پێنج کۆمەلگەھـ و ٣٤٨ گوندان پێک دھێت کو ١٥٠ ژ وان گوندان د ئاڤەدانن و ١٩٨ گوند ژی ژ بەر ھەبوونا پەکەکێ و بۆردومانا تورکیا د چۆلکرینە.
خانی نیوز، ھەیوار ستار
