بەرپرسێ راگەھاندنێ ل ریڤەبەرییا گشتی یا ساخلەمییا پارێزگەھا دھۆکێ د پرێس کۆنفرانسەکێ رۆژنامەڤانی دا راگەھاند کو ریڤەبەریا گشتی یا ساخلەمییا پارێزگەھا دھۆکێ سالە بۆری دا پتر ژ دوو ملیۆن وەلاتیان بۆ وەرگرتنا چارەسەرێ قەستا سازیێن ساخلەمیێ ل دھۆکێ کرینە، ھەمان سال ٣٤ ھزار و ٢١٢ زارۆک ژدایکبووینە.
حەمزە رەزیکی، بەرپرسێ راگەھاندنێ ل ریڤەبەریا گشتی یا ساخلەمییا پارێزگەھا دھۆکێ گۆتژی: سالە بۆری ٣٤ ھزار و ٢١٢ زارۆک ژ دایکبووینە ژ وانا ژی ١٧ ھزار و ٣٢٢ کور بووینە و ١٦ ھزار و ٨٩٠ کچ بووینە و دوو ملیۆن و ٧٨٢ ھزار و٤٥ کەسان قەستا سازیێن ساخلەمیێ کرینە بۆ وەرگرتنا چارەسەرێ ژ وانا ژی ١١٣ ھزار و٨١٢ کەس ل نەخۆشخانەیان ھاتینە نڤاندن ٣٤ ھزار و ٤٣٠ نشتەرگەری بۆ نەخۆشان ھاتینە ئەنجامدان و٢٣ ھزار و ٦٨٨ سەرەدان ژلایێ تیمێن ساخلەمیێ ڤە یێن ھاتینە ئەنجامدان و ھزار و ٤٦٢ جهـ ژبەر نەپێگیریێ ھاتینە سزادان.
رەزیکی، گۆتژی: سالە بۆری دا ٧٤.٤٠٠ تەنێن کەرەستێن ھشک ھاتینە ژناڤبرن و ١٢ ھزار و ٢٥٠ لێترین کەرەستێن شلەمەنی ھاتینە ژناڤبرن و د سالە بۆرێ دا ل دھۆکێ ٦٨٢ کەسان ژبەر نەخۆشیا کۆرۆنایێ گیانێ خۆ ژ دەستداینە و ٢١ ھزار و ٨٦٩ کەس ژ نەخۆشییا کۆرۆنایێ ب تەمامێ چارەسەربووینە کو پێنچ نەخۆشخانه ژى بۆ کۆرۆنایێ ھاتبوونە تەرخانکرن.
ناڤھاتی ئەوژی ئاشکەرا کر: د سالە بۆری دا ل دھۆکێ ھزار و ١٤٩ کەسان ژ ئەگەری نەخۆشییا دل و دەمارێن خوینێ گیانێ خۆ ژ دەستداینە و ھزار و ١١٦ نەخۆشان ژ ئەگەرێ نەخۆشیێن ڤەگر وەغەرکرینە و ٤٥٣ کەسان ژی ژبەر نەخۆشیێن مێشک و دەمارێن سەری گیانێ خۆ ژدەستداینە و ٢٩٢ کەسان ژبەر نەخۆشییا پەنچەشێری وەغەرکرینە و ١٧٩ ژ بەر سیستەمێ میزەر و گولچیسکا گیانێ خۆ ژدەستداینە و ١٠٤ کەسان ژبەر روودانیێن ھاتن و چوونێ گیانێ خۆ ژ دەستداینە و ٨١ کەسان ژبەر سۆتنێ و ٧٤ کەسان ژبەر نەخۆشیێن دەماران وەغەرکرینە.
حەمزە رەزیکی، ئەوژی دیارکرکو: ١٤٢ ھزار و ٩٧٥ ئاواران ژی ل کەمپان سەره‌دانا ساخلەمیێ كرینه و ١١ ھزار و ١٨٤ ئاوارە ل نەخۆشخانەیان ھاتینە نڤاندن و شەش ھزار و ١٨٧ زارۆک ژدایکبووینە و ھزار و ٥٧٧ نشتەرگەریێ بۆ ئاواران یێن ھاتینە ئەنجامدان.
ھەروەسا دیارکر کو ھەشت ھزار و ٨٨٥ روونشتن بۆ شووشتنا کولچیسکا یێن ھاتینە کرن و ٤٣ نشتەرگەریێن چاندنا گولچیسکا ھاتینە کرن و ھزار و ٣٣٠ قەستەرێن دلی ھاتینە ئەنجامدان بۆ نەخۆشان و ١٦١ نشتەرگەریێن دلی ھاتینە کرن و سێ ملیۆن و ٢٤٥ ھزار و ٣٥٠ پشکنینێن تاقیگەھی ھاتینە ئەنجامدان و ١٤٢ ھزار و ٤٤ پشکنینێن تیشکا سینی یێن ھاتینە ئەنجامدان و ٣٤ ھزار و ٤٣٠ نشتەرگەریێ یێن ھاتینە ئەنجامدان و شەش ھزار و ٣٥٦ رەنینێن مەگناتیسی ھاتینە ئەنجامدان دگەل چەندێن خزمەتێن.
خانی نیۆز، سالار محەمەد دۆسکی
