رێکخستنا ساخلەمییا جیھانی راگەھاند، رێکەفتن بۆ دابینکرنا ٤٠ ملیۆن ڤاکسینێن دژی کۆرۆنا ھاتییە ئیمزاکرن.
رێکخستنا ساخلەمییا جیھانی راگەھاند، د چارچووڤێ بەرنامێ کۆڤاکس دا وان رێکەفتن دگەل کۆمپانییا فایزەر-بایۆنتیک بۆ دابینکرنا ٤٠ ملیۆن قۆرچین ڤاکسینێ دژی کۆرۆنایێ بۆ وەلاتێن ھەژار ئیمزاکرییە.
ئەلبێرت بۆرلا، سەرۆکێ کۆمپانییا فایزەر د پرێس کۆنفرانسەکی دا راگەھاند، ئەو ڤاکسینێ کۆمپانییا وان پێشئێخستی ب بھایێ تێچوونا وان دێ ھێنە فرۆتن ب رێکخستنا ساخلەمییا جیھانی و ل چارێکا ئێکێ یا ئەڤسالە ڤاکسین دێ گەھیتە دەستێ رێکخستنێ.
د ھەمان دەم دا، کۆمپانییا فایزەر د توویتەکی دا راگەھاند، ئەڤ یەکە پێنگاڤەکا گرنگە بۆ روبروبوونا ڤایرۆسێ کۆرۆنایێ.
رێکخستنا ساخلەمییا جیھانی ئاماژە ب وێ یەکێ دا، ئەو ھەولددەن ب رەنگەکێ دادپەروەرانە ڤاکسینی دابەشبکەن، و بژاردەیەکا دی ژی ل بەر دەستێ وان ھەیە کو دگەل کارگەھەکا دەرمانسازی یا وەلاتێ ھندستانێ رێکەفتنەکا دی ئیمزابکەن بو دابینکرنا ١٠٠ ملیۆن ڤاکسینان.
سالا بۆری رێکخستنا ساخلەمییا جیھانی بەرنامێ کۆڤاکس بۆ دابینکرنا ڤاکسینێ کۆرۆنایێ بۆ وەلاتێن ھەژار راگەھاند.
