ته‌رمێ وان 5 كۆلبه‌رێن كورد هاتنه دیتن یێن به‌رى حه‌فتییه‌كێ هاتییه راگه‌هاندن كو كه‌فتینه به‌ر ره‌نیا به‌فرێ ل سه‌ر سنۆرێ ئیرانێ.
رێكخستنا هه‌نگاو یا مافێن مرۆڤى راگه‌هاند، ئه‌و 5 كۆلبه‌ر خه‌لكێ ده‌ڤه‌رێن سۆما و برادۆست یێن پارێزگه‌ها ئۆرمیێ بوون، به‌رى 8 رۆژان ل ده‌ڤه‌ره‌كێ د ناڤبه‌را ئیران و توركیا دا به‌رزه‌ببوون.
رێكخستنا هه‌نگاو ئاشكرا كر، دناڤا وان قوربانییان دا، كه‌سه‌كێ 18 سالى بناڤێ عه‌لاوى خودایى حاته‌م هه‌یه و یێن دى ژى هه‌ر ئێك ژ فۆرات خودایى خۆرشید، مه‌تین ئه‌سلانى ئوسمان، بیلان ئه‌حمه‌دى سادق و یاوار ئه‌سلانى لوقمان بوون.
دیار ژى كر، ده‌ستهه‌لاتدار و هێزێن ئاساییشا ئیرانێ چ هاریكارى بۆ خێزانێن قوربانییان نه‌كرن و هێزێن توركیا ژى گه‌فا گوللەبارانکرنێ ل وان كه‌سان دكر یێن ل ده‌ڤه‌رێ ل ته‌رمێن وان دگه‌ریان.
