شاندێ ھەرێما کوردستانێ ب سەرۆکایەتییا (قوباد تالەبانی) دگەل جێگرێ سەرۆکێ پەرلەمانێ ئیراقێ کومبووینە و دەربارەی پشکا ھەرێما کوردستانێ د بودجا سالا ٢٠٢١ێ دا ل بەغدا گۆتوبێژ ھاتنە کرن.
نڤێسینگەھا جێگرێ سەرۆک وەزیرێن ھەرێما کوردستانێ و سەرۆکێ شاندا دانوستانکارا حکومەتا ھەرێمێ، دگەل جێگرێن سەرۆکێ جڤاتا نوونەران (حەسەن ئەلکەعبی) جێگرێ ئێکێ و (د.بەشیر حەداد) جێگرێ دووێ کۆمبووینە.
(سەمیر ھەورامی) پەیڤدارێ جێگرێ سەرۆک وەزیران راگەھاند، د کۆمبوونێ دا کو سەرۆکێن ھەردوو فراکسیۆنێن پارتی و ئێکەتی، (ڤیان سەبری) و (ئالا تالەبانی) ئامادەببوون، گۆتوبێژ دەربارەی پەیوەندیێن د ناڤبەرا ھەڤلێرێ و بەغدا و پرۆژە یاسایا بودجا ئیراقێ بۆ سالا ٢٠٢١ێ دا ھاتنەکرن.
د راگەھاندنێ دا حەسەن ئەلکەعبی پەسنا سەرەدانا قوباد تالەبانی و شاندێ دگەل دا کر ژبۆ نێزیکبوونا دیتن و لێکتێگەھشتنا وان.
ئاماژە ب وێ چەندێ ژی کر کو شاندێ حکوومەتا ھەرێمێ بۆ رووھنکرنا زێدەتر بۆ سەرۆکایەتیا پەرلەمانێ ئیراقێ ھەموو داتا و ئامارێن پێدڤی دەربارەی بودجەی و داھات و خەرجیێن ھەرێمێ ب شێوەیەکی روون بەرچاڤکر.
