پرا (ئاڤا مارک) جھەکێ شوونواریێ دەڤەرا شێلازدێ یە و مەترسییا ژناڤچوونێ ل سەر ھەیە، (ھەیوار ئێحسان) نوونەرێ رێڤەبەرییا شوونوارێن پارێزگەھا دھۆکێ ل سنورێ دەڤەردارییا ئامێدیێ بۆ خانی نیوز راگەھاند: پرا (ئاڤا مارک) ژ روویێ شوونواری ڤە گرنگییەکا زۆر یا ھەی، ژبەرکو دیرۆکا وێ ڤەدگەریت بۆ سەردەمێن میرگەھا ئامێدیێ. ھەروەسا ژ روویێ گەشت و گوزاری ڤە جھەکێ ستراتیژییە، ئەگەر ئەڤ پرە بھێتە نووژەنکرن دێ ڤەژەنەکا ب ھێز یا ئابوری بۆ دەڤەرێ پەیدا بیت و سەرەدانا گەشتیاران بۆ وێ دەڤەرێ دێ زێدەتر بیت، چونکی ھەر د کەڤن دا پرا (ئاڤا مارک) ب ئەندازیارییەکا جوان و پێشکەفتی ھاتییە چێکرن و دێ سەرنجا گەشتییاران بۆ وێ دەڤەرێ راکێشیت.
ھەیواری گوت ژی: بەلێ مخابن بۆ دەمێ چەندین سالانە چەکدارێن پەکەکێ ئەو دەڤەر کرنە جھـ و بارەگایێن خوە، بەردەوام ژلایێ فروکەیێن لەشکرێ تورکیاڤە دھێنە بۆردومانکرن، ژبەر نەئارامییا وێ دەڤەرێ رێڤەبەرییا شوونواران نەشیایە وی شوونوارێ دێرین ب پارێزیت و گرنگیێ بدەتە نووژەنکرنا وێ.
گۆت ژی: ل سنورێ دەڤەرداریا ئامێدیێ ۳۰۰ جھێن شوونواری ھەنە، مخابن مەترسی ل سەر ژ ناڤچوونا بەشەک ژ وان شوونواران ھەیە.
پرا دێرین یا ئاڤا مارکی دکەڤیتە د گەلیەکێ کوور دا ل دەڤەر رێکان، ل گۆرێ زانیاریێن کەسێن دانعەمر ل وێ دەڤەرێ، ئەڤ پرە ل دووماھییا (چەرخێ نوزدێ) ھاتییە چێکرن، ئەو ژی پشتی کو پرا (محەمەد بەگێ ساتی) ژ بەر رابوونا ئاڤێ ژناڤچووی، پشتی ھنگێ ب ئەندازیارییەکا پێشکەفتی دەست ب چێکرنا پرا ناڤھاتی ھاتەکرن.
خانی نیوز، ئیقبال عومەر
