رۆژنامەڤانەکێ تورک یێ نێزیکی بازنەیا بریارێ د حکومەتا تورکیا دا و تایبەتمەند ب کاروبارێن رۆژھەلاتا ناڤین و سەرۆکێ مالا رۆژنامەڤانێن عەرەب ل تورکیا راگەھاند، بەشار ئەسەد، سەرۆکێ رژێما سووریێ د چەند رۆژێن بھێن دا دێ پەنایێ بەتە ئیرانێ، کو وەلاتێ ئێکانەیە ل سەر پێشوازیکرنا وی رازی بووی، پشتی ئەو دەستبەردانا خوە ژ دەستھەلاتێ ب رێیا گۆتارەکا تێلەڤزیۆنی یا راستەوخۆ رادگەھینیت.
تۆران قشلاکچی، رۆژنامەڤانێ تورک راگەھاند، د دەمێ دو حەفتیێن بھێن دا بەشار ئەسەد دێ دەست ژ دەستھەلاتێ بەردەت و ئەو و مالباتا خوە دێ چنە تەھرانێ، ژبەرکو ئیران وەلاتێ ئێکانەیە رازی بووی مافێ پەنابەریێ بدەتێ، ئەو ژی پشتی دەستبەردانا خوە ژ دەستھەلاتێ ب رێیا گۆتارەکا تێلەڤزیۆنی رادگەھینیت.
قشلاکچی گۆت ژی: تورکیا و رۆسیا دێ ب ھێزتر ل سووریێ بەرھەڤ بن و ھەردو وەلات ل سەر رێکخستنا کاروباران و پاراستنا سڤیلان و راگرتنا رەوشا ئەمنی ل سووریێ ریککەفتینە، بۆ وێ یەکێ دەولەت ژ ناڤ نەچیت.
ل گۆرەی گۆتنا قشلاکچی، رەجەب تەیب ئەردۆغان، سەرۆککۆمارێ تورکیا داخوازا ئاسانکارییان ژ رۆسیا کرییە، بەلێ جۆرێ ئاسانکارییان ئاشکرا نەکر، لێ ئەو داخوازی بۆ وێ یەکێ یە شەرێ ناڤخوە ل سووریێ روو نەدەت کو ھندەک ئالی کار بۆ دکەن.
ژ ئالییەکێ دی ڤە رۆژنامەیا سەباح یا تورکی ژی ئاشکرا کرییە، دەمەکێ نێزیک بەشار ئەسەد دێ دەست ژ دەستھەلاتێ بەردەت، بێی چ ھوورکاتیێن دی ئاشکرا بکەت.
