كۆمسیۆنا بلندا سه‌ربه‌خۆیا هه‌لبژارتنان ل ئیراقێ ده‌مێ تۆمارا بایۆمه‌ترى تا داوییا مه‌ها ئادارێ درێژكر.
خالد دۆسكى، رێڤه‌به‌رێ ئۆفیسا دهۆكێ یا كۆمسیۆنا بلندا سه‌ربخۆیا هه‌لبژارتنان بۆ خانى نیوز گۆت: چه‌ندین كار د قۆناغا نووكرنا تۆمارا بایۆمه‌ترى دا دهێنه كرن.
خالد دۆسكى دیار ژى كر، كه‌سێن گیانێ خوه ژ ده‌ست داین ناڤێن وان د قۆناغا تۆمارا بایومه‌ترى دادێ هێنه ژێبرن، هه‌روه‌سا ژ دایكبوویێن سالا 2001-2002-2003ێ ژى دێ پشكداربن، هه‌ر كه‌سه‌كێ ناڤێ وى ژى یێ شاش بیت د كارتا بایۆمه‌ترى دا، دشێت راستڤه‌كه‌ت و ئه‌ڤ كاره هه‌تا 31ێ مه‌ها ئادارێ دێ به‌رده‌وام بیت.
ژ ئالییه‌كێ دى ڤه كۆمسیۆنا بلندا سه‌ربه‌خۆیا هه‌لبژارتنان ل ئیراقێ راگه‌هاند: ژڤانێ تۆماركرنا هه‌ڤپه‌یمانى و قه‌وارێن سیاسى هه‌تا ده‌هى ڤێ مه‌هی هاته درێژكرن، بۆ كاندیدێن تاكه‌كه‌سى ژى هه‌تا ئێكى مه‌ها ئادارێ ده‌لیڤه هاتیه درێژكرن.
پرۆسا تۆمارا بایۆمه‌ترى ل هه‌ر 41 بنگه‌هێن دهۆكێ به‌رده‌وامه، رێژا تۆمارا بایۆمه‌ترى ل دهۆكێ گه‌هشتیه 61%، و به‌لاڤكرنا كارتێن بایۆمه‌ترى بۆ وان ده‌نگده‌رێن خۆ تۆماركرین گه‌هشتییه 91%.
خانى نیوز: چنار ئه‌حمه‌د
