د کۆمبوونا وەزیرێ کارەبێ دا ل گەل بریکار و راوێژکار و رێڤەبەرێن گشتی، تەئکید ل تەمامکرنا پرۆژێ بەرھەمئینانا کارەبێ ژلایێ وزا رۆژێڤە ھاتە کرن و کۆمبوونێ سەرنج ئێخستیە سەر بلەز بجھئینانا پرۆژێ پیڤەرێن زیرەک، کو باشتر دێ کونترۆلێ ل سەر دابەشکرنا کارەبێ کەت.
ئەڤڕۆ یەکشەمبی ٣١-١-٢٠٢١، ب مەرەما پێداچوون و ھەلسەنگاندنا پرۆژان، کەمال محەمەد سالح، وەزیرێ کارەبا حکوومەتا ھەرێما کوردستان سەرپەرشتییا کۆمبوونەکا بەرفرەھا وەزارەتا کارەبێ کر، د وێ کومبوونێ دا کو بریکار و راوێژکار و رێڤەبەرێن گشتیێن وەزارەتێ ئامادەبوون، جەخت ل سەر گرنگترین ئەوان پرۆژان ھاتە کرن کو مژوولی بجھئینانێنە ب تایبەت بوارێ بەرھەمئینان و ڤەگۆھاستن و دابەشکرنا کارەبێ.
د پشکەکا کۆمبوونێ دا، سەرنج ئێخستییە سەر تەندەرا بجھئینانا پرۆژێ بەرھەمئینانا کارەبێ ب رێکا وزا رۆژێ کو ب وێ رێکێ دێ دێ ٧٥ میگاواتێن کارەبێ ھێتە بەرھەم ئینان. سەبارەت پیڤەرێن زیرەک ژی وەزیرێ کارەبێ دووپاتی ل لەزاتییا بجھئینانا پرۆژەی کر، کو ب تەمامبوونا ئەوی پرۆژەی دێ باشتر کۆنترۆلێ ل سەر دابەشکرنا کارەبێ و کێمکرنا سەرپێچییان ھێتە کرن.
ھەر د وێ کومبوونێ دا بەحس ل سەرجەم ئەوان وێستگەھێن گھۆرینا کارەبێ ھاتە کرن، کو ئەڤ سالە پشکەکا زۆر یا پارێزگەھان و دەڤەرێن جودا جودا یێن کوردستانێ ھاتییە بجھئینان، وەزیرێ کارەبێ داخوازکر ھەر ژ نوکە کار بۆ گرێدانا ھەموو ئەوان وێستگەھان بھێتە کرن کو ب کارەبا نشتمانی ڤە د گرێداینە.
