راپۆرته‌كا هه‌والگیریا فرەنسی ئاماژە ب هندێ دایه، كو ئەمریکا ب جددی گوتۆبێژا ڤه‌گۆهاستنا هێزێن خوه ژ بەغدایێ بۆ هەرێما کوردستانێ كرییه.
ئه‌و راپۆرتە ژ ئالیێ مالپەرێ ئینتیلیجینس ئۆنلاین هاتییه به‌لاڤكرن، ئاماژه ب هندێ دایه، ژ ئه‌گه‌رێ ره‌وشا نه ئارام یا بەغدا و هێرشێن بەردەوام یێن سەر ده‌ڤه‌را كه‌سك ل به‌غدا، ئەمریکا نییه‌ت هەیە هێزێن زێده‌تر ژ بەغدا رەوانەی هەرێما کوردستانێ بکه‌ت، دیسان ئه‌مریكا گوتۆبێژا به‌رفره‌هكرنا بنگه‌هێن خوه یێن سەربازی ل هەرێما کوردستانێ دكه‌ت.
وێ راپۆرتێ پشت ب چەندین ژێده‌رێن ئەمنی و سەربازی یێن نێزیکى ئەمریکییان گرێداینه و گۆتییه، ل گەل بەردەوامبوونا هێرشێن ئەمنی بۆ سەر ده‌ڤه‌را كه‌سك و داخوازكرنا ئالیێن شیعى بۆ ده‌ركه‌فتنا هێزێن ئەمریکا ژ ئیراقێ، (پێنتاگۆنێ) گوتۆبێژا چەند بژارده‌یان كریه بۆ ڤه‌گوهاستنا هێزێن خوه كو هژمارا وان دوهزار و 500 سەربازن بۆ هەرێما کوردستانێ.
مالپه‌رێ ئینتیلیجنس ئۆنلاین گۆتییه ژى، کۆنسولخانا نوو یا ئەمریکا کو بریارە ل سالا 2022 دا ل هەولێرێ بهێته ڤه‌كرن، دێ بیته مه‌زنترین کۆنسولخانا وى وه‌لاتى ل جیهانێ، ئه‌مریكا نێزیکی 600 ملیۆن دۆلاران لێ مه‌زاختینه، ژبه‌ر مه‌زناهییا وی کۆنسولخانێ ئەمریکا دشێت بنگه‌هه‌كێ سه‌ربازى تێدا جێگیر بکه‌ت.
ئەڤه جارا ئێكێ نینه به‌حسێ ڤه‌گوهاستنا ستافێ سەربازی و دبلۆماسیی ل بەغدا بۆ هەرێما کوردستانێ دهێته كرن، ب تایبەتی پشتى هێرشا موشەکی یا 20 هه‌یڤا بۆرى بۆ سەر باڵیۆزخانا ئەمریکا ل ده‌ڤه‌را كه‌سك ل بەغدا.
هێرشێن سەر بالیۆزخانە و بنگه‌هێن سەربازی یێن ئەمریکا، پشتى كوشتنا قاسم سلێمانی، فەرماندێ به‌رێ یێ فەیلەقا قودسا ئیرانی و ئەبوو مەهدی موهەندس، جێگرێ به‌رێ یێ دەستەیا حەشدا شەعبی ل کانوونا دویێ یا 2020، زێده‌تر بووینه.
