وەزارەتا کاروبارێن شەھیدان و ئەنفالکریان، ل ١٧ مین سایادا کریارا خۆکوژیا ئێکێ شواتێ، راگەھاندنەکێ بەلاڤدکەت و دووپات دکەت، خوێنا شەھیدان و قوربانیان کارەساتەکە، بوویە ھێڤێنێ زێدەتر بھێزکرنا گیانێ پێکڤە ژیانێ و ئێکگرتنا رێزێن گەلێ کوردستانێ.
د راگەھاندنەکێ دا وەزارەتا کاروبارێن شەھید و ئەنفالکرییان ل حکوومەتا ھەرێما کوردستانێ ئاماژە کرییە کو ١٧ سالان بەری نوکە و د رۆژا ئێکێ شواتێ دا سالا ٢٠٠٤ێ، تیرورستێن دوژمنێن ئارامیێ و پێکڤە ژیانێ د دوو کریارێن خۆ کوژیێ دا ، کو ھەردوو لقێن دوو یا پارتییا دیموکراتیا کوردستانێ و مەلبەندێ سێ یی ئێکەتییا نیشتمانیا کوردستانێ ل باژێرێ ھەڤلێرێ پایتەختێ ھەرێما کوردستانێ کرە ئارمانج، و ١٠٣ بەرپرسێن حکوومی و سەرکردە و کادیر و پێشمەرگە و ئەندامێن ھەردوو حزبان و وەلاتی شەھید بوون و ھژمارەکا دی ژی برینداربوون.
ئەو چەندە ژی دیارکرییە، تیرۆرستان ئەڤ کارە بۆ تێکدانا ئاشتی و گیانێ لێبورینێ و خۆشیێن جەژنێ ئەنجامدا بوو، بەلێ خوینا شەھیدان و قوربانییان بوونە ھێڤێنێ زێدەتر ب ھێزکرنا گیانێ پێکڤە ژیانێ و ئێکرێزییا گەلێ کوردستانێ، نە ئەڤ چەندە ب تنێ ژی بەلکو ئیرادا بەرگریێ و قارەمانەتییا ھێزا پێشمەرگەی ل کوردستانێ پشتی چەند سالەکان داستانێن مەزن د رووبرووبوونا مەزنترین رێکخراوا تیرۆرستی تۆمارکر و پێش جیھانێ ھەمیێ ڤە شەرێ داعشێ دکر، ب وێ چەندێ کو مرۆڤایەتی ب شانازیڤە ئاماژێ پێ بدەت.
وەزارەتا کاروبارێن شەھیدان، ئاماژە ب ھندێ ژی دایە، ھەر سال ئەڤ بیرەوەرییە دھاتە ساخکرن، لێ ئەڤ سالە ژبەر رەوشا ساخلەمیێ و ئارمانجا پاراستنا ساخلەمییا کەسوکارێن شەھیدان، رێورەسمێن تایبەت ب ڤێ بیرەوەریێ ناھێن رێکخستن، بەلێ بیرەوەرییا شەھیدان دێ بلند و زیندی راگرین.
