هه‌ڤسه‌رۆكێ پیشتر یێ پارتییا دیمۆكراتیك یا گه‌لان هه‌ده‌پێ په‌یامه‌ك ئاراسته‌ى شه‌ش حزبێن ئۆپۆزسیۆنا توركیا كر.
سه‌لاحه‌دین ده‌میرتاش، هه‌ڤسه‌رۆكێ پیشتر یێ هه‌ده‌پێ په‌یامه‌ك ئاراسته‌ى شه‌ش پارتیێن ئۆپۆزسیۆنا توركیا كر و تێدا داخوازا كارێ هه‌ڤپشك كر بۆ ڤه‌گه‌راندنا ئاشتى و سه‌قامگیرییێ بۆ توركیا.
په‌یاما ده‌میرتاشى ژلایێ مه‌همه‌ت رۆشتو تریاكى، په‌رله‌مانتارێ هه‌ده‌پێ ئاراسته‌ى كه‌مال كلچدار ئۆغلۆ، سه‌رۆكێ جه‌هه‌پێ و ئه‌حمه‌د داوود ئۆغلۆ، سه‌رۆكێ پارتیا پاشه‌رۆژ و عه‌لى باباجان سه‌رۆكێ پارتیا دێڤا و ته‌مه‌ل كه‌ره‌موللا ئۆغلۆ، سه‌رۆكێ پارتیا سه‌عاده‌ت و ئه‌رجۆمه‌ن ئاكده‌نیز، سه‌رۆكێ پارتیا ره‌نجده‌رێن توركیا و ئه‌ركان باش، سه‌رۆكێ پارتیا كاركه‌رێن توركیا و جڤاتا سه‌ركردایه‌تییا پارتا چه‌پ یا توركیا هاتییه‌كرن.
د په‌یاما خوه‌دا ده‌میرتاشى گۆت، ده‌ستهه‌لاتێ كۆنترۆلا هه‌موو دادگه‌هان خستیه ژێر ده‌ستێ خوه و هه‌ر ب رێیا دادگه‌هێن هه‌ژموونا خوه ب سه‌ر هه‌مى گه‌هێن ده‌ستهه‌لاتێ دا دسه‌پینیت و بزاڤا متكرنا ده‌نگێن نه‌رازى دكه‌ت.
ئاماژه ژى ب بریار و داخوازا دادگه‌ها بلند یا مافێن مرۆڤى یا ئه‌ورۆپا بۆ ئازادكرنا خوه كر و گۆت، دادگه‌هان ب رێنماییا ده‌ستهه‌لاتێ داخوازا وان ره‌تكرییه.
ل دۆر دۆسه‌یا كۆبانێ ژى ده‌میرتاشى دیار كر، ده‌ستهه‌لاتێ ب رێیا دادگه‌هان فشارێن مه‌زن ئیخستینه سه‌ر هه‌ده‌پێ و میدیایێن وه‌لاتێ خوه ژى راسپاردینه دا هه‌ده‌پێ ب پشته‌ڤانییا تیرۆرێ تۆمه‌تباربكه‌ن، دا ب ڤى ره‌نگى خه‌لكى سه‌رداببه‌ن و ئارمانج ژ ڤى كارى ژى لاوازكرنا هه‌ده‌پێ یه و ده‌ستهه‌لات باش دزانیت لاوازكرنا هه‌ده‌پێ لاوازكرنا ئۆپۆزسیۆنی یه.
ددوماهییا په‌یاما خوه‌دا، ده‌میرتاشى داخوازه‌ك ئاراسته‌ى سه‌رۆكێن پارتیێن ئۆپۆزسیۆنێ كر و داخواز كر ب وێره‌كى ده‌ستێن خوه بكه‌نه تێكدا بۆ به‌رسینگگرتنا ده‌ستهه‌لاتێ و ڤه‌گه‌راندنا ئاشتى و سه‌قامگیریێ بۆ توركیا.
سه‌لاحه‌دین ده‌میرتاش، هه‌ڤسه‌رۆكێ پێشتر یێ هه‌ده‌پێ دچارچووڤێ ڤه‌كۆلینێن تیرۆرێ دا ل سالا 2016 هاتییه ده‌سته‌سه‌ركرن و ده‌مێ چار سالانه د زیندانا ئه‌ده‌رنه ڤه‌یه.
