بەرپرسێ ھۆبا چاندنێ ل دێرەلۆکێ دیارکر، چار پرۆژێن خودانکرنا ماسیان یێن دەستویردای ل سنۆرێ وان ھەنە کو ئێک ژ وانا شیانێن خودانکرنا ١٥٠ بۆ ٢٠٠ تەنێن ماسیان ھەنە د سالەکی دا.
ئەندازیار عسمەت ئیبراھیم، بەرپرسێ ھۆبا چاندنێ ل دێرەلۆکێ بۆ خانی نیوز دیارکر، ل سنورێ ھۆبا وان دو پرۆژێن خودانکرنا ماسیێن سەلەمون و ئێک پرۆژێ خودانکرنا ماسیێن شەبوت و ئێک پرۆژێ خودانکرنا ماسیێن کارب ھەنە، ئێک ژ وان پرۆژان شیانێن بەرھەمئینانا ١٥٠ تەن بو ٢٠٠ تەنێن ماسیان ھەنە د ئێک سال دا، ئەڤێ یەکی ژی کارتێکرنەکا باش ل سەر پێشڤەبرنا ئاستێ ئابووری ھەم یێ خودانێ پرۆژەی ھەم ژی یێ خەلکێ دەڤەرێ ھەیە.
عسمەت ئیبراھیم دیار ژی کر، ئەوان پێدڤی ب کارگەھەکێن داگرتنا ماسیان ھەیە بو ھەلگرتنا وی ماسیێ زێدەی بازاری، ب ڤەکرنا کارگەھەکا وەسا دێ بازارێ دەڤەرێ بەرھەمێن ناڤخوەیی پر کەت و دێ دەلیڤێن کاری ژی پەیداکەت.
ژلایێ خوە ڤە سدقی ھاریکی، خودانێ پرۆژێ خودانکرنا ماسیێن سەلەمون دیار کر، پرۆژێ وی شیانێن بەرھەمئینانا ٥ ملیۆن ماسیێن سەلەمون ھەیە لێ بکڕ نین و بازارێ ماسیا وان لاواز بوویە، ژ بەرکو نوکە چەندین کەس ھەنە دچنە ئیرانی ماسیێ مەزن و یێ ئامادە د ئینن ب ئەرزانتر ژ بازاری دفرۆشن، ئەڤێ یەکێ ژی کارتێکرن ل بەرھەمی ناڤخوەیی کریە.
خانی نیوز، مەحمود نھێلی
