مالپەرەکێ ئسرائیلی راگەھاند، بەشار ئەسەد، سەرۆکێ رژێما سووریێ ئیرانییان ب بارەکێ گران ل سەر ملێن خوە دزانیت و دخوازیت وان ژ سووریێ دەربێخیت، بۆ وێ یەکێ ژی پێدڤی ب ھاریکارییا ئسرائیلی ھەیە، لەورا پەیوەندییەکا نھێنی د ناڤبەرا ھەر ئالییان دا دروست بوویە.
مالپەرێ بێگن سادات یێ ئسرائیلی ژ زارێ ئەفسەرەکێ ئسرائیلی راگەھاند، بەشار ئەسەدی پەنا بۆ ئیرانییان بربوو ب تنێ ژبۆ ژناڤبرنا داعشێ و چارەکرنا شەرێ ناڤخوەیێ سووریێ، لێ نھا ئیرانی بووینە ئاریشە نە ب تنێ بۆ رژێما سووریێ، بەلکو بۆ رۆسیا ژی.
ل گۆرەی گۆتنا وی ئەفسەرێ ئسرائیلی، رژێما سووریێ ب رێیا رۆسیا و ب چەندین رێیێن دی پەیامەک گەھاندیە ئسرائیلێ بۆ ئاساییکرنا پەیوەندییان د وارێ ئابووری و وزێ دا، ھەمان دەم بۆ ئاشکرا ژی کرییە کو سووریێ پێدڤی ب ھاریکاریێن ماددی ھەیە دا بدەنە ئیرانییان دا ژ وەلاتێ وان دەربکەڤن.
مالپەرێ بێگن سادات یێ ئسرائیلی ھەر ژ زارێ وی ئەفسەرێ ئسرائیلی ئاشکرا کر، بەشار ئەسەد دخوازیت پەیوەندیێن خوە د گەل وەلاتێن سوننە ب ھێز بێخیت ب تایبەت وەلاتێن کەنداڤی داکو ھاریکارییان بۆ بھنێرن و قەرێن ئیرانێ پێ بدەت و ژ سووریێ دەربێخن.
