حکومەتا هەرێما کۆردستانێ د کابینەیا بەرێ دا زێدەتری ۹۰۰۰ یەکەیێن ئاکنجیبونێ بۆ کێم دەرامەتان راگەهاندبوون کو ل سەرانسەری هەرێمێ ئاڤا بکەن، لێ ژبەر قەیرانا دارای و شەرێ داعشێ ئەو پرۆژە هاتبوون راوەستاندن.
بەهجەت عەلی، جێگرێ سەرۆکێ لیژنا ئاڤەدانکرن و وەبەرهێنانێ ل پەرلەمانێ کوردستانێ تایبەت بۆ خانی نیوز راگه‌هاند؛ پشتی ئەو پروژە د کابینەیا بەرێ دا بریار ل سەر هاتیە دان کو بهێنە بجهئینان پشكه‌ك ژ وان کار تێدا هاتبوو کرن لێ ژبەر قەیرانا دارایی و بڕینا بودجەیێ هەرێمێ ژلایێ حکومەتا بەغدا ڤە و د هەمان دەم دا هاتنا شەرێ داعشێ بوونە ئەگەر کو کارکرن ل سەر وان پرۆژان بهێتە راوەستاندن.
بهجت علی راگەهاند ژى؛ نها وان وەکی لیژنا ئاڤەدانکرن و وەبەرهێنانێ مێهڤانداریا وەزیرێ ئاڤەدانکرنێ کریە و د گه‌ل دا کۆمبووینە و د گه‌ل سەرۆکوەزیران ژی ئه‌و پرس گۆتوبێژ كرییه و گرنگی پێدایه، هەمی بزاڤێن وان بۆ وێ یه‌كێ بووینە جارەکا دی کار ل سەر وان پرۆژان بهێتە کرن و بکەڤنە د خزمەتا خەلکی دا.
ناڤبری دیار ژی کر، وەزیرێ ئاڤەدانکرنێ پێشنیازەک بۆ حکومەتێ به‌رهه‌ڤكرییه کۆ ئەو پرۆژە بکەڤنە کاری و بەردەوامی پێ بهێتە دان و وان پشتەڤانی ل وێ پێشنیازێ کریە، د وێ باوەرێ دانە کو دێ بریارەکا باش هێتە دان.
ژئالییه‌كێ دى ڤه رێدیر سلێمان، بەرپرسێ پلاندانانێ ل رێڤەبەریا ئاڤەدانکرن و ئاكنجیبوونێ ل دهۆکێ بۆ خانی نیوز گۆت: پشتی دەرکەفتنا وێ بریارێ ژ لایێ پەرلەمانێ کوردستانێ ڤە ل سالا 2011 و ل سالا 2012 ئەڤ پرۆژە ب شێوێ پراکتیکی ل سنۆرێ هەر حەفت قەزایێن پارێزگەها دهۆکێ کار ل سەر هاتیە کرن، لێ ژبەر هاتنا قەیرانا دارایی کار هاتبوو راوەستاندن.
رێدیر سلێمان گۆت ژى: نها ل قەزا زاخۆ کار ل سەر دو پرۆژان دهێتە کرن و خزمەتگۆزاری ب شێوەیەکێ گەلەک باش بۆ هاتینە تەرخانکرن ژلایێ سەرۆکێ حکومەتێ ڤە و تێچوویا وان خزمەتگوزاریان ژی زێدەتری چار ملیار دیناران بووینە.
گووتژی: سەرجەمێ وان پرۆژان 16 بووینە و دبنە 2440 یەکەیێن ئاکنجیبوونێ ل پارێزگەها دهۆکێ و ل سەر هەر حەفت قەزایان هاتیه به‌لاڤكرن.
خانى نیوز، سەعد عاسف
