وەزارەتا بەرگرییا تورکیا راگەھاند: ئەڤرۆ چوار شەمبی مە ھێز فرێ کرینە چیایێ گارە و ھێزا سوپایێ تورکیا ئۆپەراسیونا (چەنگی ھەلۆ) بۆ سەر بارەگایێن پارتا کرێکارێن کوردستانێ پەکەکە ل چیایێ گارە یا سنورێ قەزا ئامێدیێ ل پارێزگەھا دھوکێ دەستپێکرییە.
و دیارکرییە ژی کو ٢ ھزار و ٢١٨ سەربازان پشکداری د ئۆپەراسیۆنا ( چەنگی ھەلۆ) دکەن کو پێکھاتییە ژ ھێزێن کوماندۆ (جەندرمە)، ھێزێن ئۆپەراسیۆنێ یا تایبەتێن پۆلیسێ (JOH) و ئۆپەراسیۆنا تایبەتا جەندرمە و تیمێن پاسەوانانێن ئاسایشێ.
ھەژی گۆتنێ یە تورکیا ئەڤرو سپێدێ زوو ب دژواری گوندێن دەڤەرا زێباریا بۆمبەبارانکرن و خەلکێ گوندی مال و گوندێن خوە چۆلکرینە.
خاجە عەبدولرەحمان، خەلکێ گوندێ سەرانی بۆ خانی نیوز دیار کر، ئەڤرۆ سپێدێ دو جاران دەردۆرێن گوندێ وان ھاتییە بۆمبەبارانکرن و گۆت: شڤێدی ئەو حەفت کەس ل گوندی بوون کو ژ بۆ چاندنێ چووبوون، نھا تەنێ ئەو سێ کەس ماینە و ئاکنجیێن گوندی و یێن دی ڤەگەریانە مالێن خوە ل ناڤا باژاران.
وەلاتیێ وی گوندی دیار ژی کر، ئەوێ بۆمبەبارانێ گوندێن سەرانی یا ژێری، کافیا و بابولا ل دەڤەرا زێباریا کرینە ئارمانج.
گوندێن ھاتینە بۆمبەبارانکرن، دکەڤنە سنورێ ناحیا دینارتێ ل سنورێ قەزا ئاکرێ و ژ بەر ھەبوونا چەکدارێن پەکەکێ ئەو دەڤەر بەردەوام دھینە بۆمبەبارنکرن.
