ئامێدی ئێکە ژ باژێرێن کەڤنار و شوونوارێن وێ خودان دیرۆکەکا کەڤنن، کەڤنە دەرگەھێ ئامێدیێ یێ بەرنیاس ب دەرگەھێ مووسل مەترسییا ھەرفینا وێ ھەیە .
ھەیوار ئامێدی نوونەرێ رێڤەبەرییا شوونوارێن دھۆکێ بۆ خانی نیوز گۆت: ل سالا ٢٠١٩ رێکخراوەکا ئەمریکی سەرەدانا دەڤەرداریا ئامێدیێ کر کو دێ ب کارێ نوژەنکرنا دەرگەھێ ئامێدیێ رابن لێ ژبەر نەخوەشییا ڤایرۆسێ کۆرۆنایێ نەشیان کار تێدا بکەن و نەھاتە نووژەنکرن، لێ ئەگەر بلەز نەھێتە نووژەنکرن و سەخبێرکرن مەترسییا ھەرفینا وێ ھەیە .
ناڤبری زێدەتر گۆت: پار سال ژی کونسلێ فرەنسی سەرەدانا باژێرێ ئامێدیێ کر و سۆزدایە کو گرنگیێ ب شوونوارێن ئامێدیێ بدەت لێ تانوکە چ دیارنەبوویە .
کوڤان ئیحسان شوونوارناس بۆ خانی نیوز راگەھاند: ئەڤ دەرگەھە ل ساڵا ١٩٣٥ێ وەکو شوونوار ھاتیە راگەھاندن، نڤیسینا ل سەر بۆ سەردەمێ حاکمێ ئەتابکی بەدرەدین لوئلو ل سالا ٥٤٨ مشەختی ڤەدگەریت، بخۆ سێ پەیکەرن لێ ب تنێ دو ژ وان یێن ماین.
گۆت ژی: کەڤنترین وێنەیێ وی دەرگەھی بۆ ساڵا ١٩١٣ ڤەدگەریت کو پرۆفیسۆر باخمانێ ئەلمانی یێ گرتی، د وی وێ،ەی دا گەلەک نەخش یێ ل سەر ھەین وەک وینەیێ رۆژێ و دو شەرکەرا و ئەژدەھاکی، ھەروەسا دەرگەھێ وێ یێ داری ل موزەخانا بەغدا ھاتییە پاراستن، ھندەک نڤیسین ل سەر ھەبوو بەلێ نەھاتبوو خاندن، ھەروەسا ب گوڵێن بەیبینا ئانکو لوتس ھاتیە نەخشاندن، د ساڵێن حەفتییان دا کەفتبوو و د سالا ١٩٩٨ ھاتییە نووژەنکرن .
دەرگەھێ ژێری (دەرگەھێ میرگەھێ) ئەڤە دەرگەھێ دووێ یە ل باژێری دکەڤیتە ژێریا روژئاڤایێ باژێرێ ئامێدیێ. ئەڤی دەرگەھی ٤ ناڤێن دی ژی ھەنە (دەرگەھێ مووسل) ژبەرکو خەلکێ باژێری و یێ دەڤەرێ د ڤی دەرگەھی دا ھاتن و چوونا کاروانا بۆ باژێری میسل دکر، ل دەرگەھێ رۆژئاڤایێ ئامێدیێ ب دەرگەھێ سەقافا یان دەرگەھێ میسلێ یان دەرگەھێ شنگارێ دھێتە نیاسین، دوو پەیکەرێن مرۆڤان د کەڤری دا نکلاندینە، د ناڤبەرا وان دا گیانەوەرەکێ ئاشۆپی ھەیە، ل دووڤ شوونوارناسان ئەڤ پەیکەرە بۆ سەردەمێ ئەشکانیان ( پارت – الفرتیون ) ڤەدگەریت.
خانی نیوز، ھەیوار ستار
