رێڤەبەرییا گشتى یا گەشت و گوزارێ ل پارێزگەھا دھۆکێ دیارکر کو ئاگەهـ ژ بەردانا ھرچا ل چیایێ گارەی نینە و ئەڤ کارە ب مەترسی ل سەر گیانێ گەشتیاران و تایبەت رۆژێن ئەینی ل چیایێ گارەی ل قەلەم دان.
رێوار محەمەد رەشید، پەیڤدارێ رێڤەبەرییا گشتى یا گەشت و گوزارێ ل پارێزگەھا دھۆکێ بۆ خانی نیوز ئاشکراکر کو وەک رێڤەبەریا گەشت و گوزارێ رازیبوونا وان نەھاتییە وەرگرتن ل سەر بەردانا ھرچان ل چیایێ گارەی و وان ژی ب رێکا راگەھاندنێ ئاگەهـ ژ ئه‌ڤى دەنگ و باسی بوویه.
رێوار محەمەد رەشید بەردانا ھرچا ل ڤی جھی ب مەترسی بۆ سەر گیانێ گەشتیاران ل قەلەم دا و گۆت: گرنگە ل جھەکێ دی ھاتبانە بەردان ژبه‌ركو چیایێ گارەی تایبەتمەندیا خوە ل نك گەشتیاران ھەیە و رۆژانە رێژەکا مەزن یا گەشتیاران سەردانا وى جھی دکەن و ھەتا ده‌مه‌كێ دی ژی ئەڤ ھرچە دێ ل نێزیکی وی جھی بن و دێ مەترسی ل سەر گەشتیاران ھەبیت.
گەشت و گوزارا دھۆکێ ژ گەشتیاران خواست ڤێ حەفتیێ ئاگەهـ ژ خوە ھەبیت ژبه‌ركو ئەو ھرچ دێ نێزیکی ئەوان جھان بیت و رەنگە ھێرشی مرۆڤان بکەت.
ژ ئالیێ خوه‌ڤه محەمەد تاھر سەلاح الدین، فەرمانبەرێ ژینگەھا دھۆکێ ل دۆر ڤێ روودانێ بۆ خانی نیوز گۆت: ئه‌و د گەل ئازادکرنا گیانەوەرانە ل ناڤ سرۆشتێ کوردستانێ و دێ رەوشەکا دی دەتە سرۆشتێ کوردستانێ، ئەڤ نێچیرا ھەرەمەکی ئەڤا دھێتەکرن گەلەک کارتێکرنا خوە ل ژینگەھێ دکەت، لێ ئازادکرنا ھرچان یا شاشە، ژبه‌ركو پێشتر سەربوور ھەر ل چیایێ گارەی ھەبوو سالێن بووری ده‌مه‌كێ کێم دا ھەر ئەو ھرچ نەمانە ل وی جھی .
بسپورێ ژینگەھێ گۆت: دەمێ ئەو کارە دھێتەکرن دڤێت پێزانین ل سەر وێ ھرچێ ھەبن کا کووڤی نە یان کەھی و کا دێ چەوا شێت بخوە خوارنێ پەیدا کەت و ئەڤە گرنگە و دڤێت خوارنەک بۆ بھێتە دابینکرن.
خانی نیوز، سالار محەمەد دۆسکی:
