راگەهاندنا پارێزگەها دهۆکێ د رۆهنکرنەکێ دا بەرسڤا وان تۆمەتان دایە کو باس ل زیندانکرنا هندەک کەسێن بێ تاوان دکەت و گۆتییە:
ماوەیەکە لایەنەکێ سیاسی بەحسێ گرتنا خەلکی ب تاوانا بیروباوەرێن سیاسی و ڕادەربرینا ئازاد ل دەڤەرا پارێزگەها دهۆکێ دکەت. ئازادیا سیاسی و ڕادەربرین دگەل جاسوسی و قاچاقچیاتی و فروشتنا چەک و تەقەمەنی بۆ گرۆپێن چەکدار یا جیاوازە، هەموو ئەو کەسێن ل پارێزگەها دهۆکێ هاتینەگرتن ب بریارا دادگەهێ بوویە و هەر دادگەهـ ژی دێ بریارێ لسەر چارەنڤیسێ وان دەت.
راگەهاندنا پارێزگەها دهۆکێ دیارکریە ژی: گرتن ب بریارا دادگەهێ باشترە ژ کوشتن و توقاندن و سوتن و تەقەکرن ل بارەگا و رێڤەبەریێن مەدەنی. هەبوونا تەنایی و سەقامگێریێ هەردەم باشترە ژ ئاژاوە و بەرەلاییێ، پارێزگەها دهوکێ یا ب خۆدانە و جهێ جاسوس و قاچاقچی و ئاژاوەگێرا تێدا نابیت.
هەروەسا راگەهاندییە: پاراستنا ئاسایشا سەر و مالێ هاولاتیان، گرنگترین ئەرکێ سازیێن حکومەتا هەرێما کوردستانێیە کو د چوارچووڤێ یاساییدا دهێتە جێبەجێکرن. پارێزبەندیا یاسایی لسەر ئەندامێن چ لایەنێن سیاسی نینە دەما توشی سەرپێچیەکا سیاسی دبن و هەموو بەرانبەر یاسای وەکهەڤن.
ل دووماهیا پەیاما خوە دا راگەهاندنا پارێزگەها دهۆکێ دووپاتکریە: ل پارێزگەها دهۆکێ یاسا سەروەرە، ئەگەر ل جهێن دیتر پارتێن سیاسی ل جهێ دادگەها بریارێ ددەن، ل پارێزگەها دهوکێ لایەنێن سیاسی جهێ دادگەها و کادرێن سیاسی جهێ دادوەرا ناگرن.
