پێنچشه‌مبێ جه‌ژنا خدرلیاس یا ئێزدیانه

شێخ عه‌لۆ خه‌له‌ف، زانایێ ئۆلا ئێزدیان بۆ خانی نیوز گۆت: جه‌ژنا خدرلیاس یا ئێزدیان ئه‌ڤ ساله‌ دكه‌ڤیته رۆژا پێنچشه‌مبێ ل 18 یێ شوباتێ كو مێژوویا وان ڤه‌دگه‌ریته‌ به‌ریا مووسا پێغه‌مبه‌ر و پشتی ئیبراهیم خه‌لیل هاتینه‌، خدر و لیاس ژی هه‌ردوان كه‌رامه‌ت و ئیلهام ل نك وان هه‌بوو، ب هه‌لكه‌فتا رۆژا بوونا وان ئێزدی سێ رۆژان ب رۆژی دبن و رۆژا چارێ د رۆژا بوونا خدر و لیاس دا جه‌ژنه‌ و چه‌ندین رێوره‌سمێن پیرۆز هه‌نه‌ ژ وان:

قه‌لاتك، قه‌لاندنا ده‌خلودانی وه‌ك، گه‌نم، جه‌هـ، نۆك و تۆڤێ گولان ژ به‌ر كو داویا وه‌رزێ چاندنێ یه‌ و تۆڤ ئێدی شین نابیت ژبه‌ر هندێ دبێژنێ خدرلیاس، سال خلاس.

پێخون، ژ قه‌لاتكان دهێته‌ چێكرن پشتی كو ل ئاشی دكه‌ن و دهێرن، پێخون یانكو بێخون ژبه‌ر كو دڤێ جه‌ژنێ دا چ قوربانییان ناكوژن و خوین ناهێت رێژتن، پاشان وێ پێخونێ دناڤ دۆشابێ دا تێكه‌ل دكه‌ن و سه‌ركێن خه‌بیسێ ژێ چێدكه‌ن وه‌ك شریناهییا جه‌ژنێ.

ژ كه‌ڤن دا كابانییا مالێ هنده‌ك ژ وێ پێخونێ ب شه‌ڤێ ل مال ددانیت و گه‌ر سپێدێ نیشان ل سه‌ر وێ پێخونێ هاتن دیتن رامانا وێ یه‌كێ یه‌ كو خدر و لیاس قه‌ستا وێ مالێ كرییه‌ و خێر و به‌ره‌كه‌ت دێ بۆ وێ مالێ چیت.

نێچیر د رۆژێن خدرلیاسێ دا گونه‌هه‌ ژبه‌ر كو گیانه‌وه‌ر و ته‌رش و ته‌وال ب دوگیانن و نێچیرا وان گونه‌هه‌.

ژ كه‌ڤن دا د گۆتن، گه‌ر كچ و كوڕێن ئێزدییان ل ڤان رۆژان د خه‌و دا قه‌ستا ماله‌كێ بكه‌ن و ئاڤێ ژ ده‌نێ وێ مالێ ڤه‌خۆن ب رامانا وێ یه‌كێ یه‌ كو دێ بن‌ رسقێ وێ مالێ.