بابەکر زێباری: ئارمانجا مۆشەکان ھەولێر بوویە نەک ھێزێن ئەمریکی

بابەکر زێباری، سوپاسالارێ پێشتر یێ ئیراقێ ل دور مۆشەکبارانکرنا ھەولێرا پایتەخت تایبەت بۆ خانی نیوز راگەھاند، ھندەک گرۆپ و لایەن د ناڤ حەشدا شەعبی و ئیراقێ دا ھەنە عەقلیەتا تێکدانێ ھەیە و ھەردەم دخوازن سەقامگیری و ئارامیا ھەرێما کوردستانێ و ئیراقێ تێکبدەن، ئەو گرۆپ و لایەن جودا جودا دەڤەرێن ئیراقێ مۆشەکباران دکەن وەکو فرۆکخانە و دەڤەرا کەسک یا بەغدا و ھەولێر و ھندەک جھێن دی یێن ئیراقێ، ئەو گرۆپ و لایەن ژی پشکەکا کێمن ژ حەشدا شەعبی یا ئیراقی.
زێباری گۆت ژی، ئەو گروپ و لایەن کرێ گرتینە و ئارمانجا سەرەکی یا وان نە ئەمریکایە و نە چ لایەنێن دیی یە ژبلی تێکدانا سەقامگیری و ئارامیا ھەرێمێ، ئەڤە ژی ڤەدگەریت بۆ وان پێشکەفتنێن ھەرێمێ و گاڤێن مەزن یێن ژ ھەموو لایەکێ ڤە بخوەڤە دیتی.
بابەکر زێباری ئاشکرا کر، ھەکە وان گرۆپان ڤیابا ھێزێن ئەمریکا بکەنە ئارمانج، جھێن دیتر ھەنە کو ئەمریکی لێ د جێگیرن و وان دشیا وان جھان مۆشەکباران بکەن، لێ وان ھەولێر کریە ئارمانجا خوە و ئەمریکی ل دەڤەرێ ھەبن یان نە وان مەرەم پێ ھەولێرە، ئەڤ کریارە ژی نەشێن گەلێ کوردستانێ بترسینن .
زێباری دیار کر، ھەردەمێ پەیوەندیێن ئەمریکا و ئیرانێ بەر ب نەباشبوونێ دچن ئەو دخوازن ئیراقێ بکەنە گۆرەپانا شەڕێن خوە و ئاریشەیێن خوە ل ڤێ دەڤەرێ داویێ پێ بینن، ھەرێما کوردستانێ ژی د ڤێ ھەڤکێشێ دا زەرەرمەند دبیت.

خانی نیوز، سەعد عاسف