150 سه‌ربازێن هۆله‌ندا ل فرۆكخانا هه‌ولێرێ هاتنه‌ بنه‌جهكرن

بۆ پاراستنا به‌شه‌كێ فرۆكخانا ناڤ ده‌وله‌تى یا هه‌ولێرێ، هژماره‌كا شیره‌تكارێن سه‌ربازى یێن هۆله‌ندا گه‌هشتنه‌ هه‌رێما كوردستانێ.

د چارچووڤێ پاراستنا بنگه‌هێن سه‌ربازى یێن هێزێن هه‌ڤپه‌یمانان ل ناڤا فرۆكخانا ناڤده‌وله‌تى یا هه‌ولێرێ، ده‌مێ چه‌ندین رۆژایه‌ 150 شیره‌تكارێن سه‌ربازى یێن هۆله‌ندا گه‌هشتنه‌ هه‌رێما كوردستانێ و ئه‌ركێ پاراستنا پشكه‌كا وێ فرۆكخانێ گرتن ب ستۆیێ خوه‌ڤه‌، ئه‌و سه‌ربازه‌ دابه‌شى چه‌ند تیمه‌كا بووینه‌ و هه‌ر تیمه‌كێ ئه‌ركه‌كێ تایبه‌ت پێ هاتیه‌ به‌خشین و دگه‌ل هێزێن ئاسایشێ هه‌ماهه‌نگن بۆ پاراستنا فرۆكه‌خانا ناڤده‌وله‌تى یا هه‌ولێرێ.

دوهى بالیۆزێ هۆله‌ندا ل ئیراقێ سه‌ره‌دانا شیره‌تكارێن سه‌ربازى یێن هه‌ولێرێ كر و داخویانییه‌كا رۆژنامه‌ڤانى دا گۆت، هۆله‌ندا ژبلى هایریكاریێن سه‌ربازى د وارێن ئابوورى و چاندنێ ژى دا هاریكارییا هه‌رێما كوردستانێ دكه‌ت و بزاڤێن خوه‌ یێن دبلۆماسى ژى ئێخستینه‌كار بۆ رێكه‌فتنا دناڤبه‌را هه‌ولێرێ و به‌غدا دا.