مەسرور بارزانى سەرۆکێ حکومەتا هەرێما کوردستانێ پەیامەکێ ژ بۆ ٣٣ێیەمین سالیادا کارەساتا کیمیابارانا هەلەبجە بەلاڤدکەت و رادگەهیت، ئەو ب رێزڤە یادا شەهیدێن تاوانا رژێما بەعس ساخدکەتەڤە کو ب چەکێ قەدەغەکرى هزاران مرۆڤێن بێ تاوان شەهیدکرن و ب هزارێن دى ژى برینداربوون کو هندەک ژ وان تا نها ب دەست ئازارێن برینێن خوە دنالن.
گۆتییە ژى، هەلەبجە بوویە ناسنامەیا خەبات و قوربانیدانێ بۆ گەلێ کوردستانێ د جیهانێدا، لەورا پێدڤییە هەردەم یادا شەهید و قوربانیێن وێ تاوانێ ب زندى رابگرن و بزاڤێن وان ژى بەردەوام بن ژ بۆ هندێ کو حکومەتا ئیراقێ قەرەبوویا کەس و کارێن شەهید و بریندارێن ڤێ تاوان مەزن بکەتەڤە و کاربکەین بۆ رێگرتن ژ دووبارەبوونا جینۆسایدکرنا گەلێ کوردستانێ و هەر گەل و نەتەوە و پێکهاتەیەکێ دى ل جیهانێ.
سەرۆکێ حکومەتا هەرێما کوردستانێ ل دۆر گرنگیدانا کابینەیا وى ب پرۆژەیێن خزمەتگۆزارى بۆ پارێزگەها هەلەبجە گۆتییە: ل چەند رۆژێن بورى د چارچۆڤێ پرۆژەیێن گەشەپێدانا پارێزگەهان و پرۆژەیێن وەزارەتان، وان رەزامەندى ل سەر ئەنجامدانا چەندین پرۆژەیێن خزمەتگۆزارى بۆ د بیاڤێن پر و رێک و بان و ئاڤ و کارەبێ و نووژەنکرنا قوتابخانە و نەخۆشخانە بۆ پارێزگەها هەلەبجە دایە، گۆت ژى، هیڤیدارین بشێین د ئاییندەى دا خزمەتەکا هەژیتر پێشکێشى هەلەبجە و دەڤەرێن دى یێن هەرێما کوردستانێ بکەن.
